Haba thied bor ding, kaba heh, kumno yn shu iarap ia baroh, ong ka CCOR MAU

Shillong:Ki nongtrei ka Meghalaya Energy Corporation Limited (MeECL) hapoh ka lama ka MeECL (Em ployees) Associations and Unions (CCOR MAU) ki la pynjem noh ia ka jingthmu ban iakhih ban dawa ban pyn urlong ia ki jingdawa kynthup ban siew ia ka jingsiew ba dei ban ioh hadien ba ka sor kar, ka la pynkylla kompeni noh ia ka MeECL.

Haba kren sha ki lad pathai khubor, u nongialam ka CCORMAU u bah Arju Dkhar, u la ong ba kumba ka paw, ka don ka mon sain pyrthei jong ka sorkar ban pynbeit ia ki jingeh jong ki nongtrei bad kumjuh jong ka Corporation. U la ong ba watla kan shem jingeh ban leh mynta hynrei ha ka don ka jingkyrmen ha ki sngi ban wan.
“Haduh u Iaiong 2010, ka pisa ba dei ban siew sha ki nongtrei naduh ba pynkylla Corporation ia ka MeECL ka la kot sha ka 800 klur tyngka bad ia kane la siew na ka jingioh lum khajna na ka kompeni kaba ktah jur ia ka”, la ong u bah Arju, bad u la bynra, “ngi la iakren bad u myntri halor kane, bad u la kular ban rah sha u Myntri Rangbah lashem taiew”.

Ha kajuh ka por, u la pynpaw ia ka jingsngewsih hadien ba u CMD, u la pynsangeh noh ia ka jingialang katto katne por shwa ban iakynduh bad ki.
U la ong ba la don ka jingthmu ban pynlong ia ka jingiakhih ha ka 12 tarik, namar ba kumba la dawa, ka Corporation ka dei ban ai tulop noh ia ki nongtrei shwa ka 10 tarik man u bnai.

Ha kajuh ka por, u bah Arju, u la buh jingkylli kumno ka sorkar kan shu iarap ei ia baroh kiba pyndonkam bording. Katkum ka jingong jong u, ka jingiarap bording ka dei ban long tang ia kiba duk, ym sha ki karkhana kiba kamai da ki spah klur bad kiba khlem siew bai bording da ki klur bad ban pynshitom ia ki katkum ka ain.

“Haba ngi thied ia ka bording ha ka dor kaba heh, hato ka dei ba ka sorkar kan iarap ei ia baroh, hooid, ia ki nongpyndonkam ha iing ka lah ban iarap, hynrei kaei ka jingmyntoi ban iarap ia ki karkhana kiba kamai da ki spah. Haduh katno ka jylla ka ioh jingmyntoi naduh ki snem 1990 ter ter ba ai bording ia ki karkhana kiba la pynsah da ki klur tyngka. Ngi la ong ia u myntri ban shim kam pyrshah ia kito ki karkhana ki bym siew bai bording bad ban pynshitom katkum ka ain”, la ong u bah Arju.