Ym lah pynkylla jait, da kaba shu leh aphidabit, ong U CEM

Shillong:U Chief Executive Member (CEM) ka Khasi Hills Autonomous District Council, u bah Titosstar well Chyne, u la ong ba ka Council kam lah ban pdiang ia ki briew ban shu pynbna da ka aphidabit (affidavit) ban kylla ia ka jait.

Haba kren mynhynnin ka sngi, u bah Titosstarwell, u la ong ba dang shen ka Council ka la pynmih ia ka jingpynbna ban mana ia ki briew (Khasi) kiba pynkylla jait khlem da iaid katkum ka ain jong ka District Council.
“Phim lah ban shu leit pynbna ia ka jait lajong da ka aphi dabit bad ka jingmut jong ka jingpynbna ka long ba ngi la khang tyngeh ia ki briew khamtam ia ki bor ba kim dei ban pdiang ia ki briew kiba shu pynkylla jait tang da ka aphidabit”, la ong u CEM.

U la ong ba wat la ka Council, kam pat ioh kano kano ka jingujor halor kane ka bynta, hynrei ka la iohi kumba la paw ha ki lad pathai khubor ba ki don ki briew kiba pynkylla jait man ka por. “Ngim pat ioh kano kano ka jingujor halor kane hynrei ngi la iohi ha ki lad pathai khubor ba ki mih ki briew kiba kylla jait na kawei ka jait sha kawei ka jait”, u la ong.

Ha kajuh ka por, u la ong ba kano kano ka jingpynkylla, ka dei ban don katkum ka ain. “Lada ka don ka lynti ka ain, shu buh mynta, ki don ki briew kiba ai jait mynshwa sha u kpa ha ka por ba dang rit, hynrei mynta ki sngewthuh ba kam long, ki hap leh noh da ka aphidabit, te ki hap ban ioh jingtip na ka Council bad ka Council kan hap ban ong ia ki, ba phi hap leit aplai aphidabit lane ban pynbna ialade ngam dei uta u jait, nga dei uta (jait)”, la ong u bah Titosstarwell.

U la ong ba shisien ba la wan na ka Council ki don ki kyndon ha kaba ki hap ban bud bad kam dei ban shu leit beit da ka aphidabit ban ong ba mynshwa ki ai jait sha u kpa na ka jait A, mynta kwah ban ai jait sha B ba ka kmie ka dei ka jait B, ban shu pynbna ha ka kot khubor kam long kumta.