Ka pisa te kyrhai, hynrei ka bam pat ka kyrduh

Ka dei hangne kein, ba ka la urlong ka jingong, ba phi lah ban don kyrhai ka pisa, hynrei ka bam pat ka kyrduh bad kane ka leit iahap thik ha kine ki sngi, namar ba phi don kyrhai ka pisa ban siew, hynrei la khang ia ka ding ilektrik, da ki phew kynta ha ka shisngi, nangta phi lah ban thied ia ka umbam umdih, um sait um khlieng, hynrei, haba ki tyllong um, ki la tyrkhong lut, kumta naei yn ioh um.

Kam dei tang katta, phi don bun ka pisa, ban leit iew; hynrei ym don ba die doh masi shuh, ym don ba die doh sniang shuh, ym don ba die dohkha shuh; kumta hap wan rah ia ka pla kaba thylli bad ka pisa kaba dap hi smam sha la iing bad kine ki jingkren, ki la urlong shisha, ha kine ki sngi.

La iohi ba ka sorkar India, lem bad ka jing ia sylla bad ka sorkar Jylla, ki la nang iaid shakhmat ban pynbor ia ki paidbah, ban shon aadhar bad u aadhar, mynta, ula trei kam haduh ha kpoh syndon bad kata ka long, ba uba don aadhar, un ioh khaw reshon bad u bym don te un kut artad bad la iohi, kumba ka sorkar India, ka ai por khadduh ia ka jylla, ba kan pyndep hapoh 3 bnai.

Nangta ka wan, sa kawei pat ka mat bad kata ka long, ba ki nongri masi, ki nongri sniang, ki nongdie dohkha; ki don ha ka kordit kaba jur, ha kine ki sngi, na ka jingpang sniang, pang masi, khang die dohkha bad ka jingkylli, ka long, la kane ka sorkar U Conrad Sangma, kan focus ne em ia kitei ki riew kutlad, da kata ka buit, kaba ki la pyndonkam bha, ha shwa ka elekshon bad kata ka long ban sam puk puk ia ki khun sniang, ki khun syiar, sha ki riew paidbah (bad lehse kin sam mynta, sa ia ki khun masi, ban iarap ia ki nongri jingri) bad nangta, kin sam sa ia kato ka pisa pynbieit vote kaba 5hajar shi khlieh, ba kin ia ioh thied khaw kitei ki nongri jingri bad kumba U Conrad Sangma, ula ong ba katei kam dei ka skhim pynbieit vote bad mynta, ka dei ka aiom ksar, ba un pyllait mar mar sha kitei ki riew kutlad, namar ba lada ki iap ki nongri masi, ki nongri sniang bad ki nongdie dohkha, kumta kan ktah ka ioh ka kot, ia ki hajar ki longiing.

Kane ka dei ka mat, kaba kongsan haduh katta katta, namar ba lada shah lynshop ha ka mariang, ki ia hiar wut wut ki gram sevak na Block ban leit peit ia ka jingjulor bad nangta, lada don kiba iap mynsaw na ka jing pynjulor ka mariang, ka sorkar ka ju bei pisa ia ki bad ha kane ka kynti ruh, haba ka mariang, ka lynshop, da ki jingpang khyllah; ka sorkar jylla, ka la dei ban sdang mar mar ia la ka kam bad ka dei ruh ha kaba kum kane ka por, ia ki nongrep, ki nongri jingri, ba kin mih shakhmat, ban dawa ia la ka jong ka bhah, ba ka nym don ka jingleh niew bein, ha kum kane ka kutlad.