Shit tyrkhong ka Ri Khasi

Ka Ri Khasi, ka don ha ka jingshit tyrkhong bad ka jingrang ryngkhiang kaba jubor ha kine ki sngi bad na kane ka daw, ki nongrep, ki lynniar, ba la thut lut ka thung ka tep bad kane kan nym ktah tang ia ka por thung ha une u bnai, hynrei kane kan sa ktah bad wan rah ia ka nemsniew kaba jubor, nangne shakhmat, namar ba u sohniamtra, un nym mih soh shuh,u kwai, un nym mih soh shuh bad sa ki jhur ki jhep, ki ban shah ktah jur.

Ka sorkar jylla, ka la pyni ia u dak jingma, ha kaba yn hap ban khang noh ia ka jaka sam bording na Umiam, lada kane ka jingrang ryngkhiang, kan dang iai bteng; hynrei katei kam thew, tang ia kane ka dam, namar ba ka jingduh slap, ka jia kylleng ka jylla.

Sha ka thain Riwar bad ka thain Ribhoi, ki paidbah, ki mad ia ka kordit jong ka jingshit tasam, kaba la wan rah ia ki jingpang ba har rukom bad kam dei tang ia ki briew, hynrei kane ka ktah ruh ia ki mrad ki mreng, ki jingri jingdup, kiba la ioh ia bun phew jait ki jingpang, namar ka jingtyrkhong ka mariang.

Haba ki jia kum kine ki khep, don kiba khmih lynti ia ka sorkar, ba kan leh eiei, hynrei, ka sorkar, kam don lad ban iarap, namar ha ka por jong ka khlam corona ruh, ka don tang ka jingiarap kaba shispah tyngka shisngi, na ka bynta ar taiew bad kat kane lei ka kordit, ym don ba lah ban iarap lem, lait noh, tang ialade hi shimet shimet.

Ka sorkar Telangana, ka la thaw ia ka skhim shna iing, ban pyndait thah ia ki iing shong iingsah bad katei ka dei ban wan ha ka jingmut jingpyrkhat jong ka sorkar Meghalaya ruh bad kam dei tang katta, ka wan sa kawei pat ka mat bad kata ka dei ka jingkyrduh um dih bad um rep bad ka la dei ban leh kyrkieh noh, da kaba tan um na ki wah bah jong ka Ri Khasi, lada dei ka wah Umiam, lada dei ka Umngot lane kino kino kiwei pat ki wah, ba kin pynioh um pahuh sha ki iing ki sem bad sha ki jaka rep jaka riang, namar ba lada jubor ka shit, duna sa ka um, hangta kin sa jia ki jingpang ba har rukom, ia u khun bynriew bad ba ki jingthung kin sa iap tyrkhong.

Ki jingjia, ki la long kiba ima shibun eh, namar ba kat ia ka Ri Khasi, kaba don ia ar tylli ki shnong ba pawnam tam ha ka pyrthei, ka Sohra bad ka Mawsynram, ki dang tyrkhong um; kumta katno tam, ia kiwei pat ki jylla jong ka Ri India, kiba dei ki ri shyiap bad ki jaka, kiba duna slap shi katdei bad kane ka jingjia, kaba mynta, ka la dei ban pyn kyndit bynriew iangi, ba ngi la leh bym suidniew ia ka mariang.