Sangeh ker sainar shiah, ong ka CCIB

Shillong, 22 Nailur:
Ka la don ka jing iakynduh jong ka CCIB bad u Deputy Commissioner ka East Khasi Hills mynta ka sngi bad ha katei ka jingiakynduh la rai ban sangeh noh shuwa ia ka jingbuh sngi ban leit sorbe ia ki jaka ba hap ban ker sainar shiah, kaba la buh naduh ka 28 tarik mynta u bnai haduh ka 1 tarik u risaw, la pyn sangeh noh namar ka jingther palat u slap ha kine ki sngi bad la pyn beit ban pynlong ia katei ka jingsorbe ha ki sngi ki ban sa wan hadien ba la kham rang ba ka bneng. Katei kaj ingthmu ban leit sorbe ka long na Lyngkhat sha Pyrdiwah, hynrei ka la don ka jingpyrshah namar ba ki khlieh nong synshar ka thain Dawki ki la kam ba ki don ki jaka kiba hap hapoh ka APL kiba kynthup ia ka Raid Mawshun, Raid Lyngkhat bad Raid Mukertila.
Ha katei ka jingiakynduh bad U DC ki nongialam ka CCIB ki la dawa ba dei ban pynbeit shuwa ia u pud u sam bad ki la ong ba kim pyrshah ia ka jingker sainar shiah hynrei ki pyrshah ia u pud u sam uba dang sah kynrum kynram. Ki la ong ba don ki jaka kiba hap hapoh ka Raid Mukertila kiba la shah kyntur pud ha ka Bangladesh ha kaba ka Bangladesh ka la poi shaduh sha surok National High Way sha Umsyiem bad Dawki. Katkum ka jingkwah kitei ki nongialam ki la ong ba nyngkong ki kwah ban pynbeit ia u pud u sam bad hadien sa pyndep pat ia ka jingker sainar shiah.