Yn tohkit khaw reshon ha Sohiong

Shillong, 22 Nailur:
U Deputy Commissioner ka East Khasi Hills u bah P.S Dkhar u la ong ba ha kane ka taiew ban wan un sdang noh ban tohkit ia ka jingkynnoh bamsap khaw reshon ha Sohiong bad un pyndep ia katei ka jingtohkit katkum ka por ba la buh da ka high Court. Katba u SP ka East Khasi Hills u bah M Kharkrang u la ong ba u la rejistar case ia katei ka kam katkum ka hukum jong ka high Court.
Lah ban kdew ba ka Meghalaya high Court ka la hukum ia u DC ka EKH ba un tohkit ia ka jingkynnoh bamsap khaw reshon ha Sohiong bad un hap ban pyndep ia ka jingtohkit hapoh ka lai bnai bad ka high Court ka la hukum ruh ia u SP ka EKH ba un rejistar case halor katei ka kam namarba ka Sohiong Police Station kam shym la rejistar case ia ka jingujor ba la ujor da ka CSWO.
Ha katei ka hukum u nongbishar ka High Court u Justice SR Sen u la ong “La thung ia u Deputy Commissioner , East Khasi Hills Shillong kum u ophisar u ban khlieh ia ka jingtohkit ba un tih bniah ia katei ka kam ban lap ia ki jingshisha bad ban pynshitom katkum ka aiñ ia ki briew kiba donkti, khnang ba nangne shakhmat ki paidbah kin ym ia kynduh shuh kum kane ka jingeh”.