Naduh 5tarik Jylliew, da ki odd bad even number, ban rung sha PB,Motphran

Shillong: Ka Sorkar Jylla ha ka sngi palei ka 1 tarik Jylliew, ka la pynmih biang ia ka hukum ban pyniaid noh da ki Odd-Even number ia ki kali kamai ha Nongbah Shillong, kiba iaid na ki bynta jong ka Police Bazar bad Motphran, kane ka hukum kan treikam naduh ka 5 tarik Jylliew, kum shi bynta ban tehlakam ia ka jing khapngiah jong ki surok ha ki tei ki jaka.

Kane ka hukum la pynmih da ka Deputy Commissioner jong ka East Khasi Hills District, ka Kong R.M Kurbah(IAS) mynta ka sngi Palei haba pyntreikam ia ka hukum ka ïingkashari Meghalaya High Court ba pynmih ha ka 16 tarik Nohprah 2021 bad ha ka 11 tarik Jymmang 2023, ki la bthah ia ka Sorkar ban thaw ia ki lad ki lynti ban pynduna ia ka jingkhapngiah jong ki surok ha kitei ki bynta jong ka sor Shillong.

Ka Deputy Commissioner ka pyntip ruh ba kane ka hukum ban pyniaid noh da ki Odd ki Even Number kan treikam ia ki kali kamai kum ki bos saw(PTS bus),ki kali saw(SSPTS- Maxi cab,)ki taxi rong iong bad stem, kiba iaid na kashari Point shaduh Police Bazaar bad Motphran.

Ka Deputy Commissioner ka pyntip ba kito ki kali ba don ia ki odd number,kata naduh 1,3,5,7,9, ki dei ban iaid tang ha ka sngi Nyngkong, sngi Balang bad sngi Thohdieng katba kiba don ia ki even number kata ki 0,2,4,6,8,kin iaid tang ha ka sngi Ba-ar, sngi Palei bad sngi Saitjain.

Ka Deputy Commissioner ka la pyntip ruh ba kane ka hukum kan nym treikam satia ha manla ka sngi u Blei.

Ka Deputy Commissioner kala pyntip ba baroh ki kali kamai ki dei ban don ia ka High Security Registration Plate (HSRP) bad ki dei ban don ruh ia ki Registration Certificate lada don ka jingkhmih bniah (inspection) ia ki kot ki sla jong ki kali ki jong ki ha kano kano ka por.

“Kino kino kiba pynkylla (tampered) ia ki number plate kin shah pynshitom kat kum ki kyndon jong ka ain bad lah ruh ban pynduh shisyndon ia ka laisen niah kali ka jong ki” la iathuh ka Deputy Commissioner.

Ka Deputy Commissioner ka la pyntip ba kane ka hukum ban sdang noh ia ka jingiaid Odd-Even ia ki kali kamai kan treikam pura noh naduh ka 5 tarik u Jylliew, 2023.