Shillong:Ka Khasi Authors Society (KAS) ka la ai jingmut ia ka sorkar ba kan bha shibun ba kan pynduh noh ia ka bhah thungkam kaba 40:40 ia u Khasi-Jaintia bad u Garo, bad ban pyntreikam noh da kaba thymmai, kata ban mang bhah beit 80 percent ia baroh u Khasi-Jaintia bad Garo ha ka jylla.
Haba kren sha ki lad pathai khubor, u Dr. DRL Nonglait u la ong ba ha ka jingshisha, ka bhah thungkam 80 percent ia u Khasi-Jaintia bad Garo ka la dep treikam katkum ka Office Memorandum (OM) naduh mynshwa hynrei kane ka treikam tang ha ki kyrdan district. “Kaba kham biang ia baroh lehse, ka lah ban long, lada ngi wanrah ia ka combined 80 percent ia ki trai jylla ia ki Khasi-Jaintia bad Garo ha ka jylla bad ka jingjied kan dei katkum ka jinglah bad kane kan kham pynsuk ia baroh”, la ong u Dr. DRL Nonglait.
“Ban batai kaba kumno ka policy kaba thymmai, kan kham eh, ka donkam ia ki stad ban pule bniah halor kane ka policy. Kawei kaba nga lah ban ong ka long ba ha u Nohprah 1972, kala don ka rai ka sorkar ban pynlong ia ka Combined 80 percent ia ki Khasi-Jaintia ha ki district kiba don ha rilum Khasi bad 80 percent ia u Garo ha ki district ha rilum Garo, hynrei kane kam treikam salonsar namar ba don ki bym don Khasi-Jaintia bad Garo ban pyndap ha ki kam ba lait, la pynkylla unreserved bad kane ka dei ka jingdkoh ka Reservation Policy”, u la bynrap.
U la ong ba ha kine ki khyndiat taiew, ka seng ka la peitngor bha ia ka jinglong jingman ha ka jylla na ka jingiakhih jong ka VPP hapoh ka jingialam u bah Ardent M Basaiawmoit naduh ba kila pynlong ia ka jingshong kyrain ha phyllaw ka Additional Secretariat haduh ka jingshah thngan kaba khlem pud kaba la kot mynta sha ka hyniew sngi. “Ngi iohi ba lada kam don noh kano kano ka lad ban don ka jingiakren, ka lah ban wan shibun ki jingeh ha ka imlang sahlang, ka jingthut ha ka suk ka sain bad halor kane, ka KAS ka la kwah ban ong eiei halor kane bad lehse kaba lah ban mih na ka jingnoh shiliang ka Reservation Policy kaba la pynbna naduh u snem 1972”, la ong u Dr. Nonglait.
U la ong ba kane ka Policy ka don shibun ki jingdkoh bad ka la don ruh ka jingiatai halor kane, bad ka KAS ka kwah ban pynpaw ba ka Committee halor ka Roster kan ym wanrah jingmyntoi hynrei kaba donkam ka long ban pynbeit ia ka Reservation Policy.
“Ngi kwah ban kyntu ia ka sorkar ba kan shim ia ki sien jam, ym ban shu bishar ia ka Roster hynrei ban khmih biang ia ka Reservation Policy kaba la shu sah kumto la san phew snem bad ban leh ia kaba bha tam ban ym ktah ia ki Khasi bad Jaintia bad ki Garo katkum ka riti synshar ka ri India bad katkum ka Reservation Policy ka dei ban long katkum ka jingdon jong ki paidbah jong kita ki jaitbynriew ha kata ka jylla”, u la ong.
U la kyntu ia ki seng sain pyrthei kiba don ha ka liangsynshar bad ha ka liangpyrshah ba kin shim khia lang ia kane ka kam ban wanrah ia kaba bha tam ia ki paidbah ka jylla tang da ka jingiakren.
ka dei ba phi ong. ngi ki Jaintia, Khasi bad Garo peaple ngi dei ban pan beit 80 percent ka thungkam thungjam, khnang ba u Khasi, Jaintia bad Garo un don ka intencive apple na ka sorkar padeng ban ioh Kam ioh jam ha ka jylla jong ngi, lait noh ia ka 20 percent na ka bynta u general.