Shillong:Ka Sorkar Meghalaya Democratic Alliance -2, ka la thaw thymmai ïa ka Committee jong baroh ki seng saiñ pyrthei ka Jylla, ka ban ïakren halor ka jingpyntreikam ïa ka Reservation Roster (RR) bad ka Reservation Policy (RP) ka Jylla.
Katkum ka jingpynbna ba la pynmih da ka Tnat Political, la ai por ïa kane ka Committee ba kan phah ïa ki jingai jingmut hapoh shibnai sha ka Sorkar naduh ba pynmih ïa kane ka jingpynbna.
U Chief Secretary ka Jylla Bah DP Wahlang ula pyntip ba ïa kane ka Committee ba thymmai yn khlieh hi da ka Myntri ka tnat Aiñ ka Kong Ampareen Lyngdoh kum ka Chairperson.
Kane ka jingpynbna jong ka Sorkar ka la mih ruh tang shisngi hadien ba ka Committee on Reservation Roster ba la khlieh da ka Kong Ampareen, kaba shong jingïalang ha ka sien ba nyngkong eh hynnin ka sngi Nyngkong, kala rai ban kyrpad ïa ka Sorkar Jylla ba kan pynïar ïa ka kti treikam jong ka Committee palat ïa ka Roster System da kaba shah ne ailad ba kan ïakren lang noh halor ka Job Reservation Policy.
Kane kala mih hadien ba ka Voice of the People Party (VPP), kaba don 4 ngut ki MLA, ka la rai ban nym ïadon bynta lang ha ka Committee tad haduh ba ka Sorkar ka mynjur ban ïakren halor ka Job Reservation Policy.
Ki Dkhot jong kane ka Committee ba thymmai ki dei kiba mihkhmat na baroh ki seng saiñ pyrthei ka Jylla. Kine ki long u Zenith M Sangma- AITC, Bah HM Shangpliang- BJP, Augustine Marak- GNC, Bah KP Pangniang- HSPDP, Bah Ronnie V Lyngdoh- INC, Bah Pyndapborthiaw Saibon- KHNAM, u Dr W Kharluki- NPP, Bah Renikton L Tongkhar-UDP, Bah Ardent M Basaïawmoit- VPP, Chief Secretary ka Jylla bad u Commission & Secretary ka Tnat Political kum u Member Secretary.
U Chief Secretary u pyntip ba khnang ban ailad ïa ka jingmihkhmat ba shonghok na baroh ki kynhun, ki Seng saiñ pyrthei ki lah ban phah mihkhmat sa mar arngut napdeng ki briew ba la paw kyrteng ha ka jingpynbna.
La ong ba ka Committee ka lah ruh ban pynrung ruh ïa kino kino ki dkhot ba kin ïashim bynta ha ki jingïalang jong ka Committee lada ka sngew donkam.
Phi don ban ong eiei?