La ar bnai; hynrei, ym don ba iarap ia kiba hap kali ha Rngain

Shillong:Wat la ka jingjia ka la iaid sha ka ar bnai duna eiei haduh mynta, hynrei ka longïing jong u bah Krujunelang Khongjirem, kam pat ioh jingiarap eiei na ka sorkar jylla ne na ka kompeni lait noh tang ka jingiarap ki paralok parajor.

Haba kren mynhynnin ka sngi, ka kong Anibahun Khongwet, ka kurim jong u bah Krujunelang kaba sah ha shnong Wahlyngkhat, ka la iathuh ba watla kila dep ban phah jingthoh bad ki kot ki sla sha ka sorkar ban iarap halor ka jingkynduh ia ka lanot na ka jingkhlad noh u kpa ka ïing hynrei kam pat ioh eiei satia haduh mynta.

“Ngam pat ioh jingiarap eiei na ka sorkar lait noh ka jingiarap kiba ha ïing hasem, ki paralok parajor katba ki lah ei”, la ong ka kong Aibahun.
Ka longkmie ka bym da khlain bha ka met, ka la iathuh ba ka iakynduh mawsiang kumno ban pyndap pynbiang ia ka ïing ka sem bad khamtam ban pynbiang ia ki khun kiba don saw ngut, kiba leit skul hadien ba u kpa ka ïing uba peit bad pyndap pynbiang u la khlad noh.

“Nga kurpad ia ka sorkar, ba kan iarap lem khamtam nga la shu ap beit ia ki jingdonkam na u kpa namar ba ialade ruh ngam da khlain bha ka bor met”, la ong ka longkmie.
Lah ban kdew ba u bah Krejunelang Khongjirem bad u bah Seiborlang Jaktung na shnong Wahlyngkhat ki la khlad noh hadien ba la shah rat ha ka twa ha ka 14 tarik Iaiong 2023 ha ka jingtwa ka surok ha Rngain ha ka por janmiet katba ki dang iaid lynti na ki jingdonkam ban leit phai sha la ïing.

Katkum ka jingtip, na ka liang ka ophis u BDO Pynursla ka la dep phah sha ka tnad Revenue ka ophis DC Shillong la katto katne por. Ym pat lah ban tip na kaei ka daw ba ka sorkar ka shim por ban ai jingiarap sha kine ki longïing kiba iakynduh ia kane ka apot.
Ha kawei ka liang, ka jingbishar halor kane ka kam ka don ha ka kashari hadien ba ka sorkar kala ujor ejahar pyrshah ia ka kompeni kaba pyntrei ia ka surok kaba la wanrah ka jingduh jong ki mynsiem ba kordor.

Dang shen, ka sorkar jylla ka la pynkut noh ia ka jingtreikam ka kompeni ARSS kaba ioh ban shna ia ka package jong katei ka surok ha kaba ka thain Rngain ka hap, bad ka NHIDCL ka la pynkhreh ban khot tender biang na bynta ban pynshna ia kane ka surok ar liang (two lane). Ka sorkar ka la dep aiti ha ki kompeni ban shna ia ka surok ar liang naduh 7Mer shaduh Dawki hynrei kane ka surok ka la sahteng mynta hadien ba ki kompeni kila ieh noh shiteng ia ka kam.