Pynsangeh ka KSU, ia ka interview ha ophis DMHO Nongpoh

Nongpoh:Ki nongialam ka KSU Nongpoh Circle ia kaba la ialam da u President u Samla John Lyngdoh, mynhynnin ka sngi, ki la leit ban pynsangeh noh ia ka jingthmu jong ka ophis u DMHO Ri Bhoi, ban pynlong ia ka Inter view na bynta ki kam kiba lait hapoh katei ka tnad treikam jong ka koit ka khiah.

Lah ruh ban kdew hangne, ba katkum ka jingpynbna ne (Advertisement) jong ka ophis u DM HO, Ri Bhoi District, la pynpaw ba ki la don 8 tylli ki post ba lait hapoh katei ka jaka treikam jong ka koit ka khiah, kiba kynthup ia 6 tylli ki Staff Nurse (PHC/CHC), 1 ha ka post Storekeeper bad kawei ka post Staff Nurse (RBSK).

Pynban kaba la pynlyngoh eh ia ki samla kiba la thep ha kitei ki kam ba thylli ia kaba la pynbna ruh da ka ophis u DMHO bad kaba la pynlong ia ki ba kin leit ujor sha ka KSU, ka dei hadien ba ki la poi ha ophis u DMHO, ha kaba ki la iohi pynban ba la don lypa ki kyrteng kiba la dep pynmih ban iakhun ia ka Personal Interview.

Kawei na ki samla kaba la poi ha katei ka jaka ban leh ia ka Interview, ka la pynpaw ba ka sngewlyngoh eh, ban iohi ia ki kyrteng jong kiwei pat kiba thep ia kitei ki kam ba thylli, ba ki la la dep ban pynmih lypa da ki bor pynïaid. Ha kajuh ruh ka por, ka la iathuh ruh ba kitei ki nongthepkam, ki la tip tang ia ka kyrteng jong ka tarik ban leh ia ka Interview, hynrei kim don jingtip eiei ruh em, ba la don ki briew kiba la mih kyrteng lypa, namar ba ym don satia kano kano ka jingpyntip sha kitei ki nongthep kam.

Haba iadei bad katei ka kam, u samla John Lyngdoh, hadien ba la dep ban kynduh ïa ki nongpynïaid u la ïathuh ba katei ka jingleit ban tuklar, ka dei hadien ba ki la ioh ia ka ujor na ki khun samla kiba bym shem la ïoh ban ai interview hadien ba ki la thep ïaki kam kiba lait. U la ïathuh ruh ba la lap shisha ïa kane ka jingpynmih lypa ïaki kyrteng kiba lah ban ai interview khlem da ai ka jingpyntip paidbah.

Utei u nongialam ka KSU, u la ong ruh ba katkum ka jinglap ka seng, ka long ba katei ka jingpynlong ia katei ka Interview kam shem la iaid ryntih bad bun na ki samla kiba la thmu ban leit sha katei ka Interview ki la pynpaw ïaka jingbym sngewhun bad dei halor kata ka nongrim, kaba la pynlong ia ka seng, ba ka kan pynsangeh shi syndon ia katei ka Interview, kata ka dei ruh hadien ba ki la lap ba katei ka Interview kam shym la pyniaid beit ïaid ryntih katkum ka kyndon.