DA PYNSHONGNIA

P.B.S

[ba bteng] “To seh mei, ka ktah ba phi kren kumta bad mynta nga la kylla bamut shisha” ong u khun da kaba i khia jingmut bad khni iam
“Lano men lait bad haduh katno ngan pynlut ngam lah sngewthuh shuh” ong ka kmie ha ka jingdap mynsiem.

Ka por ka tyllun bad ka por ka pynjia ia kiei kiei kumba lah pynmang. Ki longiing kiba iatyngkhuh bad mad ia la ka jingshem ba kthang kim klet ban phai sha la u Nongthaw ba un jngoh isynei ban iarap ia ki. Ha ka khim khait jong ka jingim baroh ki briew ki wad sa tang iu Blei naba ki sngewthuh dei sa tang ma U u ban kner lem ka jingiarap
“Nga isynei ia phi kong” ong ka paralok jong ka
“Te ngan leh shuh kumno kein haba ka jingsneng kam rung ha ki. Jin da lada u sngap bad patiaw ia ka jingsneng jingpyni jong nga un ym long kumne kein phi” ong ka kmie u khynnah ba shah kem
“La i dei ba ki bor shnong kin buh noh da ka awareness programme ne ka kynja counselling ban pynsngewthuh bad ialam lynti ia ki khynnah kiba dang khuit snam ban shim khia ia ka jingjakhom jingmut jingpyrkhat jong ki” pashat jingmut ka paralok.

“Hooid, ka dei kata ruh tangba wat ia la ki kmie ki kpa kiba bsa ba btiah kim leh salia, ka mut ia ka shnong lei kin sngap?” buh jingkylli ka kmie u khynnah
“Donkam ka jingiatreilang. Baroh ki sah ha shnong bad ka adong shnong ruh ka don bad u hap ban bud lada kumwei pat ka shnong ruh ka don ka bor” pynphai ktien ka paralok
“Ka jingdih sikret, duma, ka jingdih kyiad bad ka jingdih drok la dei ba ka bor shnong, ka bor sorkar, ka bor kur, ka bor balang bad ka bor iing ba kin pynlong jingiasyllok man la ka por khnang ba baroh kin sngewthuh bad pynshongnia bha ia ka bor jingktah jong ki. Une u drok lei lei lah idei ban da shim khia da kitei ki bor” la ong biang ka paralok jong ka
“Ka dei kong kaba phi ong” mynjur ka kmie u khynnah ba sah along.

“Tip balei sha ba ka pyrthei ka sniew haduh katne katne. La ker sawdong tang da kiei kiei kiba buh jingma bad jingsyier ia ka jingim briew. Haba pyrkhat jylliew bha la iohi ia ka jingroi ki balang Khristan, ki skul, kiwei kiwei ki shlem jinghikai, ki briew la bun kiba nang ba stad wat sha ki shnong kyndong ruh hynrei i pynban kumba ka jingmut briew ka nangdum arshah. Tip kaei eh mo haduh katne” ong bad kren bynniaw ka paralok kaba la iaw ka rta
“Kiei kiei baroh ki wan lymda dei ba ka don ki bor ba sha lyndet. Kane baroh ka dei namar ba la rit eh ka pyrthei. Lah iohi lut, lah tip lut, la iohsngew lut bad ka jingkwah tynneng, bad ka jingkwah riewspah jubor bad ka jingkwah iabeh kumba long kiwei ka ialam sha ki bun bah ki jingpynshoi. Kane ka jingkwah ioh noh, ka jingkwah leh khyllew ka beh brai ia bun jait ki tynrai jingsniew. Ka jingkwah ioh suk khlem da pynshitom eh ialade ka dei sa kawei pat ka daw kaba la shongkulai ha ka dohnud briew. Kata ka jingong kaba ong ‘Khlem trei shitom ym lah ban ioh’ kam imat don shuh ha kiba bun hynrei ka shu sah khyrdong khyndiat eh hangne hangtai” kren khia jingmut ka kmie uba sah along.

“Phi ioh shisha ban kren ki kyntien kiba dei sbiak khlem jingbakla shuh. Imat dei shisha kumba ong maphi ba sa long kumne ruh. Kane ka paw tyngkrein ha kiba bun bah ki khun samla jong ngi. Lada ki samla ki long kumne, mutdur sa ki khun jong ki lei tip ka ban long kumno shuh” ong ka paralok
“Ka nuksa ki kmie ki kpa, ka nuksa ki samla ka phalang lypa la kaba bha ne kaba sniew. Dei hangne ba ka shong synjor ka imlang ka sahlang lada kaba sniew ka khlain. Lada iai kren kin mih shi mih bad kaba shongnia tam ka dei kumno yn saindur ia ka ban sa wan lada ym lah pynshongnia hangta khlempep ka jingdukha bad jingsohsat kan pynkynting mawria ia ka jingim ba kordor” ong ka paralok
“Kumba da thew phi kren. Ka dei palat” ai jingiaroh ka kmie u samla
“To kata ngan leit noh shwa ho” ong ka paralok bad ka mih noh artat
Ka aiom synrai ka la leit bad la wan sa ka aiom tlang. Kane ka aiom ka dei kaba bun bha ki jingsgewbha. Ki briew kiba don baem ki la da pynmang lypa ban thied kane katai lane ban pynitynnad ia ka iing ka sem. La kiba bun ki paramarjan ki wan pynshngain bad kren ai mynsiem ia kane ka longkmie hynrei ha la marwei ka pait ka dohnud namar ki jingeh kiba ka mad bad ba ban sa ka jingduk. Kane ka kmie jong u khun tamsneng ka ju buh jingkylli ba lano un lait noh na along. Ki rangbah na ka balang ba ka don ki ju wan iasyllok bad ka man ka por. Ka tngen ka mynsiem bad kam ju klet ban phah duwai kyrpang ha kita ki khmat balang.

“To kong wat nym sngewsih than ka por kan sa poi ba un lait” la pyntngen u nongkitkam balang ba la kham tymmen
“Tang ia kata hi kein ba nga kwah bad angnud eh” la ong ka menkmie
“Phi tip kong ma ngi ki nongialam balang ngi khia ki jingmut jingpyrkhat ia ka jingroi bad ka jingkiew stet kum une u jait jingdih ba shyrkhei ha ka imlang ka sahlang jong ngi. Ym tip shuh ba balei ki leit liat haba la tip pyllein pyllein ba u dei uba shyrkhei haduh katta katta ruh” ong uwei u nongialam uba kham samla rangbah
“Don haei ka jinglait bad don haei ka jingtam ha ka jinghikai ym tip shuh” ong ka longkmie [yn dang bteng]