“Phi dei u nongïalam PRAC, phi dung ïangi bad Pruk bad Prak”

Shillong:Katto katne ngut ki riew paidbah, ki la ïatur ha ka sngi Thohdieng sha ka Ïingsah u Working President ka UDP bad Myntri Sorkar u Bah Paul Lyngdoh ha Mawprem, bad kynthoh tyngeh da ki jingthoh halor ka jingsngap jar ïa ka jingktah ka State Reservation Policy ïa ka jaidbynriew Khasi-Pnar.

Kane ka kynhun kaba don kumba 20 ngut eiei, kila ïarah lang bad la ki jong ki placard kiba don ïa ki jingthoh, “Ngi jied ïa phi ban long u Khla ym u Shrieh”, “Ka lawei bad ka shuki rai ma phi mynta, ïa ka lawei jong phi ngin sa rai ma ngi”, “Ka Jaidbynriew ne ki Sbai”, “Jingshet Kylla”.
Kila pynkymaw ruh ïa ki jinglong Nongïalam u Bah Paul Lyngdoh ha ki snem ba la leit noh da ka jingthoh ha ki banner, “Phi dei u Nongïalam ka PRAC, Mynta phi dung kylla ïa ngi bad pruk bad prak”.

Nalor kane, ki la kynthoh ruh da ka jingthoh ha ki banner, “Phin roi ma phi, ngim don jingbishni, hynrei ym da ka lawei ka hok jong ngi”.
Kila pynpaw ruh ïa ka hok ban dawa bishar thymmai ïa ka Reservation Policy da ka jingthoh “Ngi bun paid, Ngi bun Nongmihkhmat, bun ruh ki samla khlem kam, hato phi dang sngap jar”.

Kane ka jingïatur ki riew paidbah sha ka Ïingsah ki MLA ka la jia ruh ha kylleng ki jaka jong ka Ri-lum Khasi Jaiñtia kynthup ha Pynursla ka constituency u Symbud Myntri Rangbah ka Jylla, Mylliem ba mihkhmat da u MLA ka Congress, Nongstoiñ, Amlarem, Mawsynram bad kiwei kiwei.
Kane ka jingïatur ki paidbah sha Ïingsah ki MLA ka la mih hadien ka jingmih shah jingit u President ka VPP bad MLA ka Nongkrem u Bah Ardent M Basaïawmoit namar ka jingsngap jar ka Sorkar ïa ka jingdawa ban khot pynlong ïa ka Dorbar Kyrpang ka Ïingdorbar Thaw Aiñ ban ïakren bad ïa bishar thymmai ïa ka State Reservation Policy.