Khang ka kashari, ban pyni paidbah ia ka doh ba la dep ot ha dukan

Shillong:Ka ïingbishar jong ka Meghalaya High Court ka la bthah ia ka sorkar jylla, ba kan khang noh ban pyni ia ki doh ha ki dukan doh.

Haba shongbishar ia ka PIL jong ka Gau Gyan Foundation, kaba dei kawei na ki seng kaba trei na bynta ban iada, pynneh pynsah ia ka masi ka Highcourt ka la hukum ia kane ha ka sngi-thohdieng.

Ka sorkar ka dei ban buh ia ki ki nuksa bad khangnoh shisyndon ia ka jingpyni ne wah ia ki doh ha ki dukan, dei ban buh ia ki ha ki mashin Refrigerator lane kino-kino ki jaka buh, ymdei pat ba ki paidbah ba nabar kin iohi, la ong ka bench ba khlieh da u Chief Justice, Banerjee.

Ka jylla ka dei ban pyntikna ba ka jingsumar bad peit bniah katkum ka Board, lada dei kito kiba bam ki briew ne kiba pyndonkam hapoh ka jylla, dei ban shim jingkheiñ ka ba bniah,kumba la dep ban bthah ha u bnai June jong u Snem 2022,hap ban bud ryntih ia ka juh.

Ka bench ka la pynpaw ruh wat la ki la don lypa ki jingbthah na ki tnat treikam jong ka sorkar pdeng bad sorkar jylla, u nong ai mukotduma u iohi ba bun na ki kyndon ym kim shem la bud bad ka local level committee ruh ka khlem treikam satia.

Kyrmen skhem ba kum kine ki jing dkoh, dei ban shimkhia bha bad ka jylla kan pyntikna ba ka jingsumar bad iada ia ki mrad lada ka dei ban bam ki briew.

Kawei na ki bynta ka long ba ka jingpyni ia kitei ki mrad ha ki dukan ha rud surok, ka jingpyni ia ki khlieh ba la dep ban pom ha kaba baroh ki briew ki lah ban iohi.

Wat la na ka liang jong ka jylla ka la shimkhia hadien ba la dep ban ai jingmut, hynrei ki dukan ki dang bteng ban leh ia kane.

Nalor ba hap ban buhrieh na ka jingiohi jong ki paidbah, donkam ruh ba ka doh ka dei ban long kaba khuid, kam dei ban long kaba jakhlia ne ban sniew noh shwa ban die.