Ka jing shu wan khroh, ka kongAmpareen, kam long kaba dei, ong u bah Ardent

Shillong:U President ka VPP u bah Ardent M Basaiawmoit, mynhynnin ka sngi u la ong ba jing shu wan khroh ka Kong Ampareen Lyngdoh ban leit iakren bad ka sorkar kam long kaba dei khlem kano kano ka jingthoh katkum ka rukom.

Mynta ka step, ka Kong Ampareen Lyngdoh kaba dei ka myntri sorkar jylla, ka la leit jngoh ia u bah Ardent M Basaiawmoit ha jaka ba u pynlong ia ka jingshah thngan, bad ka la khroh ia u ban sangeh noh ban shah thngan namar ba ka khuslai ia ka jingkoit jingkhiah jong u bad ka la khot ban iakren bad ka sorkar.
Haba kren ha jaka shah thngan, u bah Ardent u la ong b aka VPP haba ka leit iakren sha ka sorkar ka ai da ka shithi, ba kan long ba official hynrei ban shu iawer ha lynti syngkien kam long kaba dei.

“Haba ngi leit iakren sha ka sorkar ngi ai ka shithi, ba kan long ba official hynrei ban shu iawer ha lynti syngkieng kam long kaba dei, ngi iohi ba ka Kong Ampareen ka la sngew khia hynrei na ka liang u bah Ardent u la kren skhem ba ka parti kan iakren beit ia ka Reservation Policy”, la ong u bah Ardent.

Haba kren hadien ba la mih na jaka shah thngan u bah Ardent, ka kong Ampareen ka la ong ba ka wan peit ia u bah Ardent kum ka riew shimet ym kum ka myntri sorkar hynrei kum para MLA. Watla katta ruh ka la ong ba kan iakren ha ka sorkar halor kane ka jingwan iakynduh jongka ia u bah Ardent. “Ka dei ka hok jong ki hynrei ngi kwah ban iakren namar ba kane kam bha ia ka jylla, tang katta nga don ban ong. Nga wan ban kyrpad ia I, ban weng noh ia ka jingiakhih namar ba ngi donkam ban iakren namar khlem ka jingiakren shaei ngin iapoi”, la ong ka Kong Ampareen.

Ka la bynrap, “Nga dei ka MLA, nga dei ka nongshong shnong, nga sngew donkam ban wan, nga wan, nga la leh ia la kajong ka kam, ka jingkhot ia I sha ka jingialang, ngin sa khot”, ka la ong.

Shwa ia kane, ka la don ruh ka jingiapyni nia hapdeng jongki, ha kaba ka Kong Ampareen ka la kylli kaei ka jingkwah jong u bah Ardent haba ka sorkar ka la dep thaw ia ka Committee ban bishar ia ka Roster system hynrei na ka liang u bah Ardent u la ong ba ka VPP ka ieng beit ha ka nongrim ba dei ban pynbeit ia ka Reservation Policy namar ba ka dei ka met jong baroh ka jingeh.