Ka la sdang khluit biang ka jing iakren halor ka bhah kam bhah jam, ha kine ki sngi bad ka jing ai khublei, ka leit sha ki lai tylli ki seng sain pyrthei, kiba kynthup ia ka VPP, HSPDP bad ka UDP, kiba shim ia katei ka mat, kum ka mat ilekshon jongki ha u snem 2023 bad kumta, haba ki nongmihkhmat, ki jop halor katei ka ishu, ki dei ban pynurlong ia kaba ki la khlei sha ki nongjied jongki.
Hynrei ka jingshisha, ka kren, ba kane ka mat, kam dei satia, kaba dang ia sei mynta ka sngi, hynrei ngi hap ban pynkynmaw, ba kito kiba niew burom, ia U Bah Michael Syiem, ia U bah Bull N Lyngdoh, ia U bah Robert Kharshiing (nalor kiwei pat), kum ki nongialam jong ka jaitbynriew, ki dei ruh ban kynmaw ia ki ishu jongki (namar ba ka jingtip ia ka kyrteng, khlem ka kam, kam don jingmut eiei ruh em) bad kata ka long, ba kitei ki nongialam KSU, ki la leh ia shibun ki kam radbah bad kawei na kitei, ka dei ka ishu, halor ka bhah kam bhah jam.
Ka jing iakhih ba radbah radsan, ha u snem 1987, ka dei halor kane ka ishu bad katei ka la pynlong ia U Capt WA Sangma, ban hiar na ka shuki myntri rangbah bad aiti ha U bah PR Kyndiah bad U bah Grosswell Mylliemngap, ba kin pyniaid ia ka sorkar ha shwa ka elekshon MLA 1988 bad ha katei ka por, ka la poi sha ka rai ban ia phiah noh ia ka bhah kam, ha ka jinglong ki District; hynrei, ngim tip, na kano ka daw, ba ynda wan ka sorkar Congress, ba la khlieh da U PA Sangma, katei ka ishu, ka shu kut noh.
Hadien kata, ki wan bad ki leit ki nongialam jong ka KSU, hynrei katei ka dei ka mat pdeng jong katei ka seng kaba dang iai neh haduh ha kine ki sngi, kumba ka dei ia ka lynti rel, ka ktien Khasi, u Uranium, ka ILP bad sa kiwei de ki mat ba ktah ia ka jaitbynriew.
Ngi lah ruh ban ong, ba ka KSU, kam shym la jop ban pynurlong ia kitei ki jingdawa, namar ba kam ioh ia ki riew sain pyrthei kiba iatrei lang ha syndah jong katei ka seng, hynrei, ngi hap ban kynmaw ruh, ba ha u snem 1987, ha kaba ka lyer jong ka KSU, ka la suhsieng, ha kylleng ka Ri Khasi Jaintia (hapoh ka jingialam jong U Bah Bull Lyngdoh), hynrei, haba la thaw ia ka seng ARMS, ba la kyrshan bor bah da ka KSU; katba ha ka elekshon 1988, u jop tang uwei U MLA na Shella.
Lada ka sorkar jylla, ka la rai ban pynkylla ia ka bhah kam bhah jam, kumta, ka burom kaba ha khlieh duh, ka dei ban leit sha ka KSU; kaba la mad ia ki jingshah shitom, ka jingiap jong ki dkhot jongka, ka jingshah bom shah tied, shah set phatok bad sa shibun ki jingeh, ba ki dkhot jong katei ka seng, ki la mad ia ka jingim ba sohsat ha kine ki phew phew snem ba la iaid.
Kin don ki riew sain pyrthei, kiba shim kabu ban kam trai ia kane ka mat, hynrei, kiba bun bah ki politician, ki dei kiba shu copy paste bad ia kata, la ju iohi, ba wat ha iing dorbar jylla, ba ki rah ia bun bah ki ishu ba ki shu sot, na ki kotkhubor.
Ka KSU, kum ka seng ba pawnam jong ka jylla, ka dei ruh ban husiar bha, na kum kine ki jingshah hack, namar ba, ynda la urlong ka ishu ILP, dawa ktien Khasi, khang lynti rel ne Uranium, kin kam trai pynban, da ki riew sain pyrthei.
Phi don ban ong eiei?