Ngim pat ia klet ia kaba la jia ha Mukroh bad ngim pat ia klet ruh, ia kaba la jia ha u pud u sam jong ka jylla, ha ka jing iasoi soskular U Conrad bad U Himanta, hynrei ki jingjia, ki iai jia bad la iohi, kumba ki nong Meghalaya, kim don dor eiei ruh em, ha ka jingkhlain bor jong kito kiba na Assam.
Lada peit ia ka jingshah kem jong U DTO na Williamnagar, ka paw shai, ba ki pulit na Assam, ki la shu leit sei beit na ophis ia utei u ba la don ha ka kyrdan ophisar, namar ba kam paw dak eiei ruh em, ba ki pulit jong ka Meghalaya, ki don bynta ha katei ka jingleit kem ia utei u heh sorkar bad katei ka la nang shai bha, namar ba wat u myntri jong ka tnat ka kit ka bah ruh, u kren kum u bym tip eiei.
Wan sa ha Khanduli, ha ki khyndiat sngi ba ladep, ha kaba ka kali jong u heh duh jong ka District jong ka West Jaintia hills, U Superintendent of Police, ka shah lun maw ha Khanduli bad wat ialade ruh, u lait iap, da ka said; hynrei, ym don satia uwei ruh uba shah kem. Ba kan da jia, kum ha Mukroh, kumta kin jin da la bun, kiba la liem lyndang; hynrei ha ngi pat, ha ka jaka, ban wad ia kiba thmu pyniap ia U SP, u myntri ka Meghalaya (ym u myntri ka Assam), u lum da ka dorbar ban iakren ia suk ia ki ar kynhun.
Wan sa ha Mawshun, ha kaba ki BSF, ki siat im im peit peit, ia u nongniah trok ba pli, hynrei, hangtei ruh ym don eiei satia bad la shu ia tip paidbah, ba ki shipai BSF, ki tian bishar hi ma ki, ia kitei ki shipai siat briew bad katei ka dei kaba sngewtriem shi katdei, namar ba nangne shakhmat, lada shah shoh ne shah pyniap ki riew paidbah, ha kitei ki shipai, kaba mut, ba ki shu iap ei ha madan, khlem don ba shah pynshitom.
Kam kut tang katta, wan sa ka jinghap maw ha Rngain, ha kaba ar ki mynsiem briew, ki la shu duh ei; hynrei, kat haduh ha kine ki sngi, ngim tip, la ka ejahar jong ki pulit, ka la poi shaei bad la ki la lap ksai ne em, ia kito kiba long ka daw jong ka jingiap ki arngut.
Lada ia kren shuh, ngi iohi, ba haduh ha kine ki sngi, kiba ha iing jong ki 5ngut kiba shah siat iap ha Mukroh, kim pat ioh satia ia ka jing bishar kaba hok bad katei ka la long ka jinglehrain bad ka jingshah nion bein ia ka hok longbriew manbriew bad ngim tip, la kata ka jingtohkit CBI, da U Conrad bad U Himanta, ka la lap ne em, ia ki riew thrang snam, lane ioh katei ruh ka dei pynban, ka buit ban khyrwait kylla ia ki riew paidbah jong ka shnong Mukroh, namar ba ka Meghalaya, kam pdiang ia ki CBI ban tohkit halor kine kino ki kam tuh kam thiem ha ka jylla.
Ngin nym iatih tyllong satia, hynrei ngi tip, tang kawei, ba ki jylla shatei lam mihngi, haba shah nion ki briew lajong, ki leit beh wut wut ban patrong ia ki riew runar; katba hangne, ngim pat klet, ia U Vicky Dey, u bym pyrwa eiei, namar ba u triem ban kiar, na ka jingshah kem, la bun bun snem.
Phi don ban ong eiei?