Kyndit tyngeh, U bah Samlin, ba shah pynliem jin 3 hajar vote

Shillong:Ka jingmih ka elekshon na Sohiong ka la pynpaw shai kdar ba ki paidbah ka bynta ka Khasi Hills, kim pdiang ia ka NPP, wat la ka don ha ka bor synshar ha ka jylla.

U kyrtong ka NPP uba shah rem u bah Samlin Malngiang, u la kyndit ty ngeh ban shah pyn liem jin haduh 3 hajar vote tam ha u kyrtong ka UDP u bah Synshar Kupar Roy Thabah.
“Nga la sngew kyndit ban shah rem namar ba nga sngew ba nga la trei bha, nga kyrmen skhem ba une uba jop un trei bha ia ka kam”, la ong u bah Samlin haba kren hadien ba u la mih na kamra niew vote na ka jingshah rem ha kane ka sngi Saitjain.

U la bynrap, “Ym lah ban mutdur ia ka jingkwah jong u paidbah, ha ka jingshisha ngi la trei bha bad ki paidbah kila pdiang ia ka jingialap elekshon jong ngi, hynrei kyndit kynsan ka la kylla kumne, ym tip na kaei ka daw, ka rai u paidbah ka dei kaba khadduh bad ngi hap ban pdiang ia ka rai u paidbah”.

U bah Samlin u la kyntait ruh ba shah rem na ka daw jong ka NPP. U bah Samlin u la jop MLA na HSPDP na Sohiong ha u 2018 hynrei u la mih noh na kane ka parti ban leit iasoh sha ka NPP shwa ka elekshon 2023.
Ka NPP kaba jop 26 ngut ki MLA, ka ioh tang 2 ngut ki MLA na konstitwensi kiba hap ha East Khasi Hills katba ka iaid thylli na Eastern West Khasi Hills, West Khasi Hills, South West Khasi Hills. Ka jop kawei na East Jaintia Hills, 3 ngut na West Jaintia Hills bad ar ngut na Ri-Bhoi bad 18 ngut na Garo Hills ha ka elekshon ba dang shu dep. Ka kiew sha ka 28 ngut mynta hadien baar ngut ki MLA ka PDF, ki la leit pyniasoh sha kane ka seng hadien ka elekshon.