5 sngi kynthih, yn don ka jinghap slap kaba jur, ba khie ka eriong Mocha

Shillong: Ka eriong, kaba khlain bor bha, kaba la jer kyrteng da ka “Mocha” ka la iaid ha ki khyndiat kynta ba ladep, sha ka thain shatei lam mihngi bad kumjuh ha ka duriaw bah Bay of Bengal, ha ka jingstet kaba 21 Kilometre ha ka shi kynta. Katei kan nang kiew sha ka thain shatei lam mihngi, ha kaba kan iaid ruh sha Bangladesh bad sha Myanmar bad kan don ka jingbeh jong ka lyer kaba stet haduh katta katta ha kitei ki ar tylli ki ri, ha kaba ka jingstet kan long hapdeng ka 180 KM haduh ka 210 KM, ha ka shi kynta.

Kumta ha ka 14tarik Jymmang, kan don ka jinghap slap kaba jur, ha ki katto katne ki bynta jong ka jylla; ha ka 15tarik Jymmang, kan don ka jinghap slap kaba jur bad kaba jur bha ha ki bynta jong ka jylla, ha ka 16tarik Jymmang, kan don ka jingtied pyrthat bad meh leilieh lem bad ka jinghap slap kaba jur ha ki bynta jong ka jylla, ha ka 17tarik kan don ka jingtied pyrthat meh leilieh bad ka jinghap slap kaba jur ha ki bynta jong ka jylla bad ha ka 18tarik, kan don ka jinghap slap kaba jur bad kaba jur bha ha ki bynta jong ka jylla.