Ka jingiakhun kan long hapdeng ka UDP bad ka NPP ha Sohiong

Sohiong:Ka jingjied jong ki 34 hajar tam ki paidbah nongthep vote ia u kyrtong ban long u MLA ka Sohiong konstitwensi kaba la pynsangeh noh shipor, sha ka ing dorbar thawain ka jylla ka la kut mynhynnin ka sngi, kaba sdang naduh ka por 7 baje mynstep haduh 4 baje janmiet. Ka Sohiong ka don 6 ngut ki kyrtong kynthup ka UDP, NPP, HSPDP, TMC, BJP bad Congress.

Katkum ka jingiakren bad ki paid bah jong ki katto katne ki jaka thep vote, ka jingiakhun kan kham long hapdeng ka UDP bad ka NPP, wat la ym lah ban khein troin ia kiwei ki kyr tong kum ka Congress.

Ha thain Rangshken ka jingiakhun kan long hapdeng ka UDP bad ka NPP kiba iadon lang ha ka sorkar MDA-2, bad na kane ka thain, lah ban kham wan shakhmat ka UDP. Ha jaka thep vote ha Dongkiingding, Sohiong ka lah ban kham tam ka Bom, katba ha ka thain Krang lah ban kham kiew u kyrtong ka NPP, bad kiwei ki jaka marjan. Ha ka thain Mawmaram ka lah ban knieh ka Congress namar ba u kyrtong u dei na kato ka thain.

Katba kiwei ki kyrtong kim da don than ka jingiakhun lait noh tang ha ki katto katne ki jaka, katba kiba kham don ka jingialeh, ki dei ka UDP bad ka NPP bad kumjuh ka Congress haba khein kyllum ha baroh kawei ka Sohiong konstitwensi.

Ha ka jingiakren bad ki lad pathai khubor, ki paidbah, ki la pynpaw ia la kajong ka nongrim balei ki jied ia ki kyrtong. Ki don kiba jied ia u MLA barim hynrei mynta ki jied noh ia u kyrtong ka UDP bad kane ka jia ha ka thain Rangshken, bad kumjuh ha ka thain Mawdngung. Ka thain Lawmei, Kreit bad kiwei ki jaka ba marjan ka NPP ka lah ban poi kham shakhmat.
Ka jingniew vote kan long ha ka 13 tarik mynta u bnai.