Ha Umling, kem ia 4 ngut kynthup ia ka kynthei ba khaii drok

Nongpoh:Hynnin ka miet ha ka por 9 baje ei ei, ki Pulit ka Ri Bhoi lyngba ka tnat Anti Narcotic Team Force (ANTF), ki la kem ia 3 ngut ki shynrang bad kawei ka kynthei, hadien ba ki la shah kynnoh ba ki dei ki nongkhaii drok.

Ka jingiohkem ki Pulit ia kitei ki 4 ngut, ka dei hadien ba ki pulit ki la ioh jingtip ba la don kawei ka kali kamai (Tourist Taxi), kaba la mih na Jorabat sha ki thain Nongpoh bad kaba la suba ruh ba ka kit drok, kumta haba ki Pulit ki la pynap shrip ha Umling, ki la bat ia katei ka kali bad kiba la kem syndon ia kitei ki saw ngut kiba don hapoh katei ka kali.

Haba ki Pulit ki la iohbat ia katei ka kali, ki la talasi ia baroh ki bynta jong katei ka kali, kumta haba ki Pulit ki la talasi bha, ki la ioh ban kurup ïa u Drok Heroin uba la shongdor kumba T. 20 lak, nalorkata ki thyrnia Injection kumba 11 tylli, 4 tylli ki Mobile Phone bad ka song pisa kaba T. 15,550 hajar.

Ia kitei 4 ngut kiba la shah kem, ki Pulit kin dang pynlong ia ka jingtohkit kaba bniah bad ha kajuh ruh ka por ia kitei ki 4 ngut, la pynhap ia ki ha ki kyndon jong ka NDPS Act.