Sha u Modi, yn ujor ka KSU; ba iap ka samla na Marngar

Nongpoh:U Samla Ferdynald K. Kharkamni, President ka KSU, North Khasi Hills District, u la pynpaw ia ka jingsngewkhia kaba khraw eh halor ka jingkhlad kaba kyndit ka samla Wa linda Binong na ka shnong Nongagang, Marngar, kaba la khlad noh mynha ka 27 tarik u Iaiong ha ka jaka sah jong ka ha Mody University jong ka jylla Rajasthan.

Haba iadei bad katei ka jingkhlad kaba kyndit jong katei ka samla ha ka jong ka jaka sah bad kaba la pynsuba sniew eh ia kiba haiing hasem, u President ka KSU, NKHD, u la wad jingtip na u Kpa jong katei ka samla ba la khlad bad na ka jingiathuh da u Kpa, la ong ba ki bor ba deipeit jong katei ka Skulbah, ki la ong ba katei ka ka la khlad noh da kaba dih bih bad sdien ha u tyllai phasi bad kaba la pynsngewsih eh ia kiba haiing, namar kim lah ban ngeit ba ka khun jong ki, ba kan dih bih ne ban phasi ialade.

Shuh shuh, u la ong ruh ba katkum ka jingiathuh da u Kpa jong katei ka samla, kaba la ioh jingtip lyngba ka Post Mortem, nalor ka jingdon ki dak mong ha ryndang ka la don ruh ka jinglait ha ki bynta ki shyieng kti jong katei ka samla bad ka ki dak jngem ha ki kjat jong katei ka samla.
“Haba la sngewthuh ia kaei kaba la iathuh da u kpa jong katei ka samla ba la khlad, ka seng ka sngewkhia eh bad kaba la shim ia ka rai ban shimkhia halor katei ka jingjia, da kaba ujor syndon sha u Narendra Modi, Myntri Rangbah ka ri bad kynjuh ruh sha Amit Shah, Myntri Kam Pohiing, na ka bynta ban kyntu ia ki ba ki dei ban shimkhia ha ka ban pynlong ia ka jingtohkit halor katei ka jingjia ba khlad kyndit katei ka samla” ong u Samla Ferdynald K. Kharkamni.

Nalor ka jingthmu ban ujor sha kitei ki heh duh ha India, ka seng ka dawa ruh ia ka sorkar jylla ba ka dei ban kren lem sha ka sorkar pdeng, ka dei ban shimkhia ïa katei ka kam ban pynlong ka jingtohkit kaba bñiah, khnang ba kiba haiing ki ioh ia kata ka jingbishar kaba hok bad ba kin lait na kaba sah hapdeng ka umdum, khamtam na ka bynta ka shongshngain jong ki samla na ka jylla bad kiba leit ban pule ha kylleng ki jaka hapoh ka ri.

Ha kajuh ruh ka por, utei u nongialam ka KSU ha Ri Bhoi, u la ai ka jingkhublei kaba kyrpang eh ia ka KSU Delhi Unit, kiba la shimkhia ban synran lang ïaka ïing ka sem jong katei ka samla haka por ba ki leit shaw ïaka met jong ka samla Walinda ban wanrah noh sha ïing.