Dawa na U Conrad, ban weng noh, ia ka UDP, na ka sorkar

Shillong:Ka jing ia kawang nia hapdeng ka UDP bad ka NPP kiba iadon lang ha ka sorkar MDA-2, ka la jubor bha ha ka elekshon MLA jong ka Sohiong konstitwensi, ka ban leit sha ka jingjied ia u nongmih khmat ha ka 10 tarik mynta u bnai.

Ha ka jingialang paidbah ka NPP ha shnong Krang ha kane ka sngi Nyngkong, ka la don ka jingdawa na u nong pyniaid jingialang ka NPP ha u Conrad K Sangma, shwa ba un kren, ba dei ban beh noh ia ka UDP, na ka sorkar khnang ban ai shuki myntri ia u bah Samlin Malngiang, ynda u la jop ha ka 13 tarik Jymmang 2023.

Hynrei u Conrad haba kren halor kane, u la ong ba ia mynta ym pat lah ban shim ia kano kano ka rai namar ba ka dei tang ka jingiateh ktien bad ym pat don ka jingkyntiew kurim ne namar ba ym pat pynbna ia ka result. “Kane ka dei tang ka jingiateh ktien, kam pat dei ka jingkyntiew kurim, hadien ba u bah Samlin, u la long u pyrsa kurim ban long MLA na ka NPP, ngin sa iakren ia kane ka kam myntri”, la ong u Conrad.
Kumba ka long mynta ka jingiakynthah iakawang nia ha ka jingialap elekshon ha Sohiong ka jur bha hapdeng ka UDP kaba pyniakhun da u pyrsa jong u (L) HDR Lyngdoh bad u kyrtong ka NPP u bah Samlin Malngiang, hynrei kam shym la don ka jingiakynther ia kiwei pat ki kyrtong.

Ym tang katta, u nongialam ka NPP, u bah Bajop Pyngrope ruh u la sangah ia ka UDP ba lada ka nud ban kynthah ia ka NPP, balei kam mih noh shwa na ka sorkar bad kumjuh u kyrtong u bah Samlin u la ther ia ka UDP. U symbud myntri rangbah ruh u bah Prestone Tynsong, u la ther khlem sangeh ia ka UDP, ha man ki jaka ba pynlong ia ka jingialap elekshon ka thain Sohiong da kaba sin ba ka dei tang ka parti kaba lah ban ngam kum ka lieng rit.

Shwa ia kane, u kyrtong ka UDP u bah Synshar Kupar Roy Lyngdoh Thabah, u la ong ba ha ka jingpyniaid jong u Blei, ym lah ban tip ba lada ka jop ka UDP na Sohiong ka lah ruh ban kylla ka sorkar. Kane ka jingkren u kyrtong ka UDP ka la pynktah mationg ia ka NPP kaba ialam ia ka sorkar khamtam kaba jop 26 ngut ki MLA ha kane ka elekshon. Ym lah ban tip kaei ban jia hadien ka elekshon hynrei ki paidbah ba bun ki khmih lynti hadien ka sngi niew vote ha ka 13 tarik mynta u bnai.