Phah notis ka MUDA ia ka iing ka lok u MLA ka South

Shillong 16 Nailur:
Ka Meghalaya Urban Development Authority (MUDA) mynta ka sngi ka la phah notis sha ka iing ka long jong u MLA ka South Shillong u Bah Sanbor Shullai ka Kong Polly Rabon namar ka jingpyn khein ia ka ain jong ka MUDA ha ka jingshna ia ka iing da kaba pynkha khlem ioh jingbit na ka MUDA.
Kane ka iing ka don ha Kench’s Trace, Laban.
Ha ka notis, ka MUDA ka la bthah ia ka Kong Rabon ban ai ia ka jubab hapoh 15 tarik Risaw lym kumta kan sa tah laha ia ka iing.
Ha ka notis, ka MUDA ka la ong ba ka Kong Rabon ka la pan permishon ban shna ia ka iing ba saw mala kynthup bad ka khrum ha 6 tarik Risaw, 2009.
Hynrei, ka Kong Rabon ha ka 20 tarik Naitung, 2011 ka la pan biang ia ka permishon ban pynkha sha jrong sa ar mala hynrei na ka liang ka MUDA ka la kyntait ia kane ha ka 20 tarik Risaw, 2011.
Katkum ka jingong ka MUDA, kam don ka kyndon Meghalaya Building Bye Laws 2001 ban shna palat ia katei kaba la pan permishon.
“Hynrei, na ka MUDA ka la ioh jingtip ba phi la shna beain ia ka iing khlem ka jingioh bor na ka MUDA da kaba pynkhein ia ki kyndon”, la ongka MUDA.
Ha kajuh ka por, ka MUDA ka la phah notis ruh sha ka iing ka Raid Laban Sports, Social and Cultural Organisation (RLSSCO) ha Kench’s Trace.