Don kiba thmu ban khanglad, ba ngan wan kanbas elekshon, ong U Bah Metbah, haba leit iuhkjat ha Krang

Shillong:U President ka UDP u bah Metbah Lyngdoh, mynhynnin ka sngi u la ther ia kiwei ki seng sain pyrthei kiba pynthut bad pyrshang ban khanglad ia ka jingleit kynduh briew bad ialap elekshon jong u ha ka thain Sohiong na bynta ka elekshon MLA.
Haba kren ha ka jingialang ha shnong Krang mynhynnin ka sngi, u bah Metbah u la ong ba ki don ki briew kiba thmu ban khang ia u, ba un wan ban iakynduh ia ki briew ban rung ing, ban rung dihsha ha dukan, hynrei u la ong “Lada wan kiwei ka long balei ym long ban wan manga”.

“Ki tieng mo ban wan ma nga, nga wan tang ban pyn shngain, nga wan ban iarap ban pynshai ia u kyrtong ka parti. Mynta ka sngi u Myn tri Rangbah u Conrad K Sangma u wan myn ta ka sngi hangne ha Krang, mat wan seh, leh aiu, don ka hok ban wan na bynta u kyrtong ka parti lajong. Te ban wan ma nga ym long, nga ruh dei u President te, ngam tip, ha jaka ban iakren ha kine ki rynsan, hynrei na u rangbah bym poi pyrkhat u kren ia kata”, la ong u bah Metbah.

U la ong ba um ym tieng, hynrei un wan beit ban synran ban pynshngain ia u kyrtong ka UDP. U la ong, “Ban da dei ha kine te, ka jingsynshar, lada bat jubor ma ki te, imat ka elekshon kin iaid beit shakhmat phan ia iap ia im ruh. Ha kano ka rukom ki khang ia nga ban leit sha ki shnong ki thaw”, la ong u President ka UDP.
U la ialap elekshon ia u kyrtong ka UDP u bah Synshar Kupar Roy Lyngdoh Thabah bad u la ong ba un wan beit, ym don ba lah ban khnang ba un ialap elekshon ia u kyrtong ka party.

Ha kajuh ka por, u la maham ia ki paidbah ban ym biej pisa namar ba kan long kaba ma bha lada ka pisa kan wan ban taplup ia ka jaitbynriew. “Don kiba ong shim la ka shim, ka vote te ai beit sha ka bom, don pat ba ong ba sngew bieij shisien ba la shim hap ai ia ka vote. Nga ong iaphi ia bishar kam long kaba bha ba kane kan wan taplup ia ka jaitbynriew jong ngi”, la ong u bah Metbah.

U la kyntu ia ki paidbah ban neh skhem ban ym shah pah shah phon ha ka por elekshon, ioh baba hadien. “Ka por elekshon kam dei ka por ba phin iashim ia ka pisa, kiar rai maw rai dieng”, u la bynrap.