Ki samla Khasi, kiba don shabar jylla (khamtam sha ki bynta ba shatei jong ka India), ki don borabor, ha ka jing shongsyier bad ka daw, ka long ba ki don ki kynhun jaitbynriew, kiba peit ia ka dur ka dar, ka jingngeit niam, ka riam ka beit, ka ktien ka thylliej bad kiba kynnoh, ba ki Khasi, kim dei ki nong India, nangta kiba shim ba ki dei ki jait bynriew bapoh bad ki peit niewbein, haba ki don sha kitei ki jylla.
Ki la don shibun ki jingjia, kum ka jingshah leh beijot, ka jingshah byrngem, ka jingshah pyniap bad ki jing shah kynnoh ba har rukom ia ki samla Khasi, haba ki don ha ki jing pule, lane ki jingtrei jingktah, sha ki jylla bapher ka India.
Mangi pat hangne, ia ki jaka ba bun bah, la aiei sha ka sorkar India, ha kaba ka Mawdiangdiang, ka la dei ka jaka sah jong ki bar jylla suda, kiba trei ha ki phew tylli ki ophis jong ka sorkar India; katba ki para ri jongngi, ki shu peit jawdud narud, ia ka jingheh kam kiba nabar.
La iathuh, ba wat tang ha Assam, tang shu la kam lyngba ka Guwahati; ki Khasi jongngi, ki shah pyndik borabor ha ki pulit Assam lane ha ki riew paidbah; katba mangi pat hangne, la iohi, ba ki dkhar ki la poi lut sha ki shnong ki thaw bapher, ha ka kyrteng jong ka jingleit thied tiar jot, leit die mar pusari ne jngohkai pyrthei bad ki la shu tam ei, ia ka jing i shngiam jong ka Ri Khasi, khlem da bei pisa satia, wat shi damli ruh.
Lyngba kine ki jingjia bapher, ka la dei ia ka sorkar jylla, ba kan pynshlur ia ki samla Khasi, Garo ba kin thaw ia ki sengbhalang jongki, haba ki don shabar jylla bad ka dei ruh ban shim kyrteng ia kitei ki samla kiba don kylleng ka India ne wat sha ki bynta jong ka pyrthei bad kan buh noh, da kawei ka website lane ka hotline number, na ka bynta ban iakren ia ki jing donkam bapher.
Ym tang katta, ka la dei ruh ban pyndonkam ia ki nongtrei jong ki Meghalaya House, kiba don ha Kolkata, Delhi, Bangalore, Mumbai lane sha kiwei ki jylla, ba kin leit jngoh khah khah ia kito ki jaka ba ki don marjan, ban ia syllok halor ka jinglong ka shong ka sah jong ki samla pule, lane ki nongtrei ruh kumjuh kiba don shabar bad katei khlem pep, kan pyn shynrain, ia kito ki trai shnong sha Ri thor, ba kin nym nud shim kabu ia ki samla jongngi.
Kam dei tang katta, hynrei, ka la dei ruh ia ki samla jong ka thain shatei lam mihngi, ha ka lama jong ka NESO lane ki kynhun niam, ba kin lum kin lang noh, ia ki para thain, kiba don sha ri thor, ban ai jingshngain, ha ki jaka trei jongki.
Nga iohsngew bad bna ba ki IAS officer ba wan na shabar ka state jong ngi kim donkam ban siew income tax hangne ha jylla jong ngi namar ka siew ka sorkar na ka bynta jong ki. Tang ka jylla jong ngi kaba leh kumta wat ki jylla ba pahuh pahai ruh kim leh kumta!!! Riewspah shisha phi ka jylla jong ngi ban thied light na shabar pat ym don pisa!!