Ba lip ding jan 24 kynta, kynduh ka JAC ia u myntri bor ding

Shillong:Ka Joint action committee (JAC) jong ki lai tylli ki kynhun sengbhalang kum ka Ribhoi Youth Organi sation (RBYO) ka Seng Meghalaya People United Front (MPUF) bad ka Meghalaya People Social Organi sation (MPSO), ki la leit ban iakynduh kyrpang ia u myntri jong ka tnat ki kam bording ka jylla u AT Mondal haba iadei bad ka jing shah ktah jur jong ka thaiñ Ribhoi baroh kawei na ka jing pynlip ding jong ka sorkar.

Haba iakren bad ki lad pathai khubor, hadien ba la mih na kamra treikam jong u Myntri u bah Jackson Sohtun u ba dei u dkhot jong ka JAC, u la iathuh ba ka jingleit jong ki ban ia kynduh ia u myntri ka dei halor jong ka jing lip ding ba khah khah ha ka thain ribhoi, namar ka jing lip ding, ha katei ka thaiñ kam dei shuh tang ha ka por ba la buh ban pynlip, hynrei ka jing lip, ka la long palat ia ka por ba la buh.

U bah Jackson Sohtun, u la iathuh ruh ba ka jing shah iehbeiñ jong ka thaiñ Ribhoi kam dei tang ha kine ki khyndiat por, hynrei ka la mad ia kane la palat phew snem,ka jingioh ding, kum ba long lei mynta ka long tang ar ne lai kynta ha ka shi sngi, kaba ktah haduh katta katta ia ki paidbah jong ka them Ribhoi.
U la iathuh ruh, ba na ka liang jong ka JAC ki phah ruh ia ka dorkhas sha u myntri ba ka jing lip ding kam dei shuh ban long na ka por sha ka por, ki nongialam jong ka JAC ki la iathuh ruh ba na ka liang jong u myntri u la kular ban shimkhia haba iadei bad kane ka bynta bad ban lum ruh ia ka jingialang bad ki bor jong ka district.

Na ka liang jong u wei pat u dkhot jong ka JAC, u la iathuh ba ka jing pynlip ding, ka long kaba la palat namar la buh ha 7 baje haduh 8 baje janmiet bad ka ding, ka jah biang naduh 11 baje haduh 6baje mynstep. Ym tang katta hynrei ka ding bunsien ka thut beit wat ha ka por 8 ne 9 baje mynstep, kam juh wan tista, hadien kata ka la poi biang sa ka por pynjah ding, naduh 9 baje haduh 12 baje shiteng sngi.

Kine ki nongialam jong ka JAC ki la ong ruh ba lada pynshong nongrim ia ka jing jah ding, ha ka thaiñ Ribhoi hi ka long beit kumba 24 kynta, kumta ki dap da ka jing sngewkhia bajur namar ba lada pyrkhat ia ki khynnah ba pule, ki kmie ki kpa ba pynbiang ka shet ka tiew . Ka JAC ka la pynpaw ruh ba ka jingpynjah ding, ha ka por mynmiet ka wanrah pynban ia ki kam sniew kum ki kam tuh kam thiem bad kiwei pat.
Ka JAC jong ki lai seng ka buh ia ka jingkyntu ia ka sorkar bad ia u myntri jong ka tnat bording ba kin shimkhia bad ka seng hi kan ap ia ka jingkular jong u myntri haba iadei bad kane ka kam.