Sdang ia pyni bor, ka NPP bad ka BJP ha ka lympung sain pyrthei

Lyngba ki khubor, kiba paw ha kine ki sngi, la iohi, ba ka sain pyrthei ha ka jylla, ka khluit tar tar bad ka iaid napoh napoh bad kata, ka dei hapdeng ka seng BJP bad ka NPP bad kata ka long, ba ki MLA ka TMC, ki don jingthmu, ban pyn iasoh ialade sha ka BJP, ha ki khyndiat sngi, ki ban sa wan.

Katei ka khubor, khlem pep, ka la pynkyndit thiah, ia ka NPP bad ka dei na katei ka daw, ba ka sdang ban teh ban khum ia ki seng tit ha ka jylla, kynthup ia ka PDF, kaba don tang arngut ki MLA bad lehse, kan dang thawlad ban klun lang sa ia ki MLA shimet, kiba don arngut, lane lada ka dei ia ka HSPDP, UDP bad kat ia kiba kwah ban khlieh dor ialade.

Lada ka BJP, kan ioh ia 7ngut ki MLA, kumta, ka lah da kaba suk ban thied khlieh briew, kumba ka leh sha kiwei pat ki jylla; hynrei, haba sngewthuh, katei ka seng, kan nym iaid stet satia ia katei ka phang, namar ba kan pynleit jingmut shwa ia ka elekshon MP 2024, namar ba ka don ia ka thong, ban iakhun ia baroh ar, ki Constituency na Shillong & Tura bad ha katei ka jingkhein, ka plie lad ia ka NPP, ba kan khih khohreh, ban lum ban lang, ia kito kiba kwah ban pyniasoh ialade, ha shwa ba u syntiew lotus, un pyni kam hadien u jymmang 2024.

Kam dei tang kata, hynrei ka NPP, kan thawlad ruh ban jop na Sohiong, khnang, ba kan pyni sha u paidlang ka jylla, ba ka dei ka parti Khasi; namar ba ia mynta, la ithuh da baroh, ba katei ka dei ka parti Garo, namar ba ka jop bun eh na Garo hills, katba ka jop tang arngut na Khasi hills.

Mynta, ka shai kdar, ba ka jingiakhun pleng, ka long hapdeng ka NPP pyrshah ia ka BJP bad kam dei satia bad ka UDP lane kiwei ki seng rit bad ki seng tit ha ka jylla bad na ki dak, kiba shai, la iohi, ba ki jingkren jong U Amit Shah bad U Narendra Modi, ha ka elekshon MLA 2023, ki la nang paw ha ki kam bad kawei na kita, ka long ka jingduh ding jong ka MeECL, kaba U Amit Shah, u ong, ba katei ka tnat, kan sa khyllem noh shen bad katei ka la urlong shisha, namar ba ka jingbei pisa na ka sorkar India, ruh ka la sangeh noh bad na kata ka daw, ka jia ka jing pynlip ding, kaba da ki phew phew kynta.

Katba ka jia, hynrei ka BJP, ka don ia ka thong jongka ban pynurlong ia kiba bun ki mat, lada dei ka UCC, ka CAA, kawei ka ktien bad sa shibun ki mat, kiba ka angnud ban pynurlong noh shen.