Ka sorkar, kam don pisa ban thied bor ding, ong u myntri

Shillong:Ka khubor ba sngewsih ia ki paidbah ka jylla ka long ba ka jingpynlip ding kan iai bteng haduh 7-8 kynta man ka sngi haduh ban kylla da kumwei pat bad ka daw ka dei namar ba ka sorkar kam don pisa ban thied bording nabar bym don pisa, nalor ka jingduna slap haduh ba ki projek pynmih bording la hap ban khang shwa.

U myntri ka tnad bording ka jylla u Abu Taher Mondal, u la ong ba ka sorkar ka hap ban pynlip bording bun kynta ha ka shi sngi namar ba kam don pisa ban thied bording nabar ba ka la rem dor palat katba ka die tad ia ka bording sha ki paidbah.

“Ka jingthied bording ka long ba ka bording ka rem palat, ym lah kotbor ka sorkar. Kawei ruh ka long ba ki don ki kyndon ba ngi hap ban thied katkum u pud bad kawei ruh ka dei na ka jingduna slap palat, bad ngi dang shu ioh slap hynnin ym kum mynshem ba ngi ioh slap kloi”, la ong u Mondal haba kren mynta ka sngi.
U la ong ba kiwei ki jylla ki la ioh slap, hynrei ka jylla Meghalaya ka ioh duna slap bha mynta u snem.

Ha kajuh ka por, u la ong ba ka Leshka Project ruh hap ban khang noh shwa, namar bym don um bad ka pung Umiam ruh ka duna bha ka um bad ka jingpynmih bording ka duna bad lah ban khang ia kane ruh lada ka bteng ka jinghiar ka jingdon ka um.

“Ngi la pyrshang tyngeh da ka borbah ban pynthikna ban pynduna ia ka jingpynlip ding hynrei ia mynta ka jingpynlip ding kan bteng haduh ba ngin ioh ka jingjynsur na ka Power Grid”, la ong u Mondal.

Ka jingpynlip ding ka sorkar haduh 8-9 kynta ha ka shi sngi ka la ktah lut ia ka trei ka ktah jong ki paidbah nadong shadong, hynrei kaba kham ktah shuh ka long ba wat ha nongbah Shillong ruh ka jingpynlip bording ka long kaba jubor haduh katta katta khlem da iakren sha ki jaka nongkyndong, kiba ioh ding tang kum ka ding prew.