Rangshken:U kyrtong ka United Democratic Party (UDP) na Sohiong konstitwensi u bah Synshar Kupar Roy Lyngdoh Thabah u la ong ba um donkam ban kynthoh ia kiwei hynrei u kyrmen ba kiei kiei ki dei ki jingpyniaid jong u Blei.
U la ong ba ym lah ban tip ha ka jingpyniaid jong Uba najrong, wat ka sorkar ka lah ban kylla pynban hadien ba la ioh ia ka result MLA ka Sohiong ha ka 13 tarik Jymmang ban wan.
Haba kren ha ka jingialang paidbah ka thain Rangshken mynta ka sngi ha shnong Rangshken, u bah Synshar u la ong, “Ym donkam ban kynthoh iano iano, hynrei ngan kren aiu ki nong Sohiong ki donkam ba ngan leh. Ym dei ban shah ialam bakla ha ka jingpynsngewthuh jong kiwei bym don briew shuh bad kumne kumtai. Ai lad ia nga ba ioh lehse ngan leit sha ing dorbar, kan long ka jingkyrsiew thiah ia kiwei ruh”.
U la bynrap, “Ngim tip ba ha ka jingpyniaid jong u Blei, ba lada ngan jop na Sohiong ka lah ban wan ka jingkylla ha ka sorkar”.
U bah Synshar uba ju khot ieid kum u Pup, u la ong ba ka jingjaw ummat kthang ha ka 20 tarik Rymphang kin kylla jingkmen ha ka 13 tarik Jymmang ban wan.
“Ngi la jaw ummat haba khlad u Maheh, ka la pyndukhi ia ngi ban nion ia u budam ha ka shap ka bom bad ha ka 13 tarik u Jymmang ban wan ia ki ummat ba jaw, kin kylla sha ka jingkmen. Ka jingjop jong nga kan dei ka jingjop u Maheh Don, im ka kyrteng sah ka nam bad jong phi paidbah ka Sohiong”, u la bynrap.
Ka UDP ka la pyniakhun ia u bah Synshar hadien ba u kni jong u, u bah HDR Lyngdoh u la khlad kyndit noh ha u 20 tarik Rymphang shwa ban leit sha ka jingiathep vote haduh ba la hap ban sangeh ia ka jingpyllong ia ka elekshon ha Sohiong.
Ka jingialang jong ki paidbah ka thain Rangshken ka la long mynta ka 24 tarik Iaiong 2023 ha Rangshken shi bynta ban ialap elekshon kaban long ha ka 10 tarik Jymmang 2023, ha kaba ki nongialam ka UDP kynthup u President u bah Metbah Lyngdoh, u General Secretary Bah Jemino Mawthoh bad katto katne ki MLA ka parti, ki la iadon lang.
Lada wan ka jingkylla ka lah ban dei ka jingshah kynjat ka UDD na ka sorkar MDA 2.0.