Pynher shithi ka BJP sha Delhi bym don VC

Shillong, 15 Nailur:
Ka Bharatiya Janata Yuva Morcha (BJP Youth Wing)  Meghalaya ka la pynher shithi sha ka myntri ka Human Resource Development ka Smriti Irani  ban iathuh ia ka jingmih ka kynrum kynram ha ka skulbah North Eastern Hill University (NEHU) namar ka jingbym don u Vice-chancellor ba pura.
Ha ka shithi, ka party ka la ong ba ki don haduh kumba 65 tylli ki kolej ha  Meghalaya kiba pyniasoh bad ka NEHU  kynthup ki kolej shimet bad ki skulbah bym dei sorkar.
Ka jingbym don u Vice Chancellor ba pura ka la ktah ia ka jingtreikam kane ka skulbah bad ruh ia ki kam ki jam jong ki samla pule.
“Ka la ktah ia kumba  4000 ngut ki samla pule ka NEHU”,  la ong ka BJP Youth Wing.
Ka la ong ruh ba ym lah ban shim ia ki rai ba donmkam ba kongsan namar ka jingbym don u VC ba pura. Halor kane, ka BJYM ka la kyntu ia ka myntri ba kan leh eiei mardor ia kane khnang ban ioh da u Vice-Chancellor ba pura.