Lap ia ka metiap ka ‘thei Samla na Rynjah

Shillong, 15 Nailur:
Mynta ka step ki pulit ka nongbah Shillong ki la lap ia ka metiap jong kawei ka ‘thei samla na Rynjah. Katei ka metiap ka dei jong ka kong Ebansara Mawrie, 27 snem karta kaba shong basah ha Rynjah, ha kaba la lap ia ka metiap jong ka na ka jaka kaba don shadien ka ITI Rynjah na kawei ka Wah kaba pyniakhlad ia ka Rynjah bad ka Law-U-Sib.
Katei ka ‘thei samla ka la jah na la iing naduh ka sngi palei jong ka taiew ba la dep bad ha katei ka por ba ka jah rngai na iing ka la leit ryngkat bad u para ar kmie jong ka u Ricky Mawrie, 22 snem karta hynrei naduh katei hi ka sngi kam shym la wan phai iing satia bad u Ricky ruh u la jah rngai. La iathuh ba ka jingleit ryngkat jong ka kong Ebansara bad u Ricky ka long da ka jingmut ban ia leit Guwahati, ong ki tyllong khubor bad dei halor katei ka jingtip ba ki pulit ki la ioh ban kem ia u Ricky na nongbah Guwahati mynhynnin ka sngi.
Hadien ba la shah kem ha ki pulit la ong ba u Ricky u la phla ha ki pulit ba u la batbor bad pyniap ia katei ka hynmen ar kmie lajong, bad u la ialam ruh ia ki pulit sha katei ka jaka kaba don ha Rynjah kaba la jia ka jingjia. Haba la poi ha katei ka jaka ki pulit ki lap nyngkong eh ia ka slipar jong katei ka samla kaba don shiliang sha kawei ka jaka bad shiliang sha kawei pat ha ki bynta jong ka Hospital kaba don ha ITI Rynjah, hynrei kham hadien ki la lap ia ka metiap ha kawei ka Wah bad ka metiap ka la long lyngkhuit. Ki pulit ki dang tohkit bniah ia u Ricky ban lap ia ka jingshisha baroh ne ioh don kiba dang donkti shuh shuh ha katei ka jingjia.