Kwah U Mukul, ban iakhun kum u kyrtong BJP sha Lok Sabbha?

Shillong:Ki khubor bapher, ki la mih ha ki khyndiat sngi ba ladep, halor ka jingthmu jong U Mukul Sangma, nongialam ka seng Trinamool Congress, ban leit rung sha ka BJP, ha ryngkat bad ki 4ngut ki MLA jong katei ka seng, lait noh U bah Charles Pyngrope, uba dei ruh U President jong katei ka seng, ha ka jylla.

Halor katei ka khubor, haba la wad jingtip, da U Rupang, la sngewthuh, ba ka thong jong U Mukul Sangma, ka long, ban iakhun ia ka elekshon Lok Sabbha 2024 na Tura Constituency, na ka tiket jong ka seng BJP, lada katei ka seng, ka mynjur, ban ai tiket ia u bad ka jingiakren, ka dang iaid halor katei ka phang hapdeng U Sangma bad ki nongialam ba ha khlieh jong ka BJP.

Kumba long mynta, ka BJP, ka don ia arngut ki MLA bad lada ki 4ngut ki MLA, kin iasoh sha ka seng, kumta ka jingdon briew jong katei ka seng, kan kiew sha ka 6ngut bad ha katei ka jingkhein, ka BJP, kan lah ban pynkhynniuh ia ka seng NPP bad ia ka sorkar synrop MDA, ha ka jylla.

Ki 5ngut ki MLA jong ka seng AITC, ki kynthup ia U bah Charles Pyngrope, uba jop na Nongthymmai, U Md Miznur Rahamankazi na Rajabala, U Rupa M Marak, na Dadengre, ka Miani D Shira na Ampati, U Mukul Sangma na Songsak.