Nongpoh: U samla Cooperson Lyngdoh Nonglait 19 snem ka rta na ka shnong Sohparu Lawse bad uba la jah rngai na ïing ha ka 10 tarik mynta u bnai, la lap noh ïa u ha ka shnong Syngku, Ri Bhoi District.
Katkum ka jingïathuh da u Bah K. Shadap, Rangbah shnong Syngku, la ong ba utei u la poi ha katei ka shnong dangstep phyrngab, ha kaba la lap nyngkong da ki briew shnong bad kiba la pyntip wut wut sha u kum u rangbah shnong, khnang ba utei u samla un ïoh ïa ka jingiarap bad khamtam eh ban pyntip sha ki bor ka Aiñ.
Haba ki briew na katei ka shnong, ki la kylli pyrthew ïa utei u samla ba kumno u poi sha katei ka shnong, utei u samla u la jubab ba u la shu ïaid lamwir namar ba um tip jaka shuh shano ban leit bad khamtam ban poi sha la ka jong ka shnong, namar ha kine ki sngi ba la dep u la shu ïaid lamwir khlem pisa, khlem bam khlem dih, ha kaba u la shu bam katba ïoh.
Haba u rangbah shnong lem bad ki briew shnong, ki la kylla ïa u ba kumno u la poi sha katei ka shnong, ha kaba u jubab da kaba ong ba ha ka por ba u thmu ban leit sha la ka jong ka shnong sha ki thaiñ Nongstoiñ, hynrei u la kum shong pynban da ka kali kaba hiar sha Guwahati.
Naduh ka por ba u hiar ha Guwahati, u la shu ïaid lamwir beit la katto katne sngi lyngba ki khlaw ki btap, tad haduh ba un da poi ha ka shnong Syngku bad kaba u la ïoh syndon ïa ka jingïarap na ki paidbah jong katei ka shnong.
U rangbah shnong ha ryngkat ki nongïalam shnong bad ki riew paidbah, haba ki la sngewthuh ba utei u briew u la don hapdeng ka jingeh, ki la pyntip noh sha ki Pulit ka Umsning Police Station, khnang ba kin ïoh ban leh ïa kaba donkam bad khamtam eh ban pynpoi ïa utei u samla sha la ka jong ka shnong.
Ki briew jong ka shnong Syngku, haba ki la sngew sangsot eh ïa ka jingshem jong utei u samla, ki la pynlong ruh ïa ka jingnoh synniang da ka pisa, khnang ba utei u samla un ïoh ban pyndonkam haba u donkam bam ban poi sha la shnong.
hat off shnong Syngku