Da ki spah, ki long iing ka Rambrai, ki iamih pynkhuid shnong

Nongstoin, 14 Nailur:
Myn ha ka sngi saitjain jong ka taiew ba la lah, ka shnong Rngi Lower Iew Rambrai, ka la pynlong ia ka jingpyn khuid shnong, ha katei ka jingia pynkhuid shnong la wan ban iashim bynta da palat 200 tylli ki long iing lem bad ki briew kiba shong dukan ha katei ka iew Rambrai.
U Sordar katei ka shnong u bah Bullstarwell Marbaniang, u la pynpaw ia ka jingsngew kmen namar katei ka sngi ka la long ka sngi kaba jop bad u la ai khublei kyrpang ruh ia u BDO Nongstoin C&RD Block West Khasi Hills bah V.Swer namar ka jingiatreilang ka jong u ban phah ia ka kali kynshait um, ka fire brigade bad kumjuh ruh ia ka kali kit um jong ka company shna surok ka BSC C&C JV.
U la pynpaw ia ka jingaikhublei ba kyrpang khamtam ia ki paitbah nongshong shnong baroh ba kynthup ia ki nong shong shnong ba pura, ki nongshong wai bad ki nongshong dukan kiba la iatrei shitrhem baroh shi sngi ban pynkhuid kham tam namar ba ka la dei ka iew kaba la kham heh ha ka Hima Rambrai.
U bah Marbaniang u la pynpaw ka jingkyrmen kaba skhem ba lyngba kane ka jingsdang ban pynkhuid ia ka shnong ka thaw, kan iarap ban pynsngewthuh ia ki paitbah nongshong shnong ia ka jingkordor ka jingleh khuid na ka bynta ka koit ka khiah bad yn iai bteng ia kane ka kam man u snem, bad u la pynpaw ruh kane kan long ka nuksa ia kiwei pat ki shnong ba marjan ba kin bud lem ia katei ka nuksa kaba bha.