Ka Dalu, ha Garo hills; ka thymmei jong ka khlam sniang

Shillong:Ka Tnat Animal Husbandry & Veterinary ka Jylla ka la pyntip ba ka khlam sniang ba la tip ha ka ktien nongwei kum ka African Swine Flu, ka la lynshop mynta ha Jylla bad pynbna ïa ka shnong Dalu bad ka Asiragre kiba hab hapoh ka Dalu Block, West Garo Hills kum ka thymmei ba sdang kane ka jingpang (Epicentre).

Kane ka jing pyntip ka la mih hadien ba ka Tnat ka la ïoh ïa ka kaiphod jingtohkit na ka North Eastern Regional Diagnostic Laboratory (NERDDL), Guwahati ba pynthikna ïa ka jinglynshop jong ka jingpang African Swine Flu hadien ka jingleh test ïa ki snam sniang. Ïa kane ka kaiphod la ïoh pdiang ha ka 30 tarik Lber, 2023.

U Dr. Manjunatha, C, IFS, Secretary ka Tnad Animal Husbandry & Veterinary u pyntip ba ïa kane ka kaiphod la ïoh pdiang ha ka 30 tarik Lber, 2023 bad kum shibynta ban ïada, tehlakam bad ban rat dyngkhong ïa kane ka jingpang, u Lat ka Jylla ula pynbna ïa ka Shnong Dalu bad Asiragre kum ki thymmei basdang kane ka khlam.
U Lat ula pynbna ïa kane katkum ka kyndon 6 bad kyndon 20 jong ka Prevention and Control of Infectious and Contagious Diseases in Animals Act, 2009.

Une u Heh Ophiar u pyntip ba ka Sorkar ka la pyntreikam ïa ki jingpyrkhing ba mardor ha kine ki shnong bad pynbna ruh ïa ki shnong ba hapoh ka 1 Km radius na kine ki thymmei kum ki ‘Infected Zone” bad baroh ki shnong ba hapoh 10Km radius kum ki “Survellance Zone”.
Ka Sorkar ka la pynmih ruh ïa ki jingbthah ba ym shah shuh ban kit ïa ki sniang, ki sboh, ki doh kynthup ruh ki tiar ki tar na ki sem sniang bad kumjuh ruh ki dawai ba sumar ïa kine ki sniang na kine ki shnong ba la ithuh kum ki Infected Zone sha ki Survellance Zone bad ki shnong ba pat don jingpang.
La khang ruh ban kit ïa ki sniang, ki sboh, ki doh, ki jingbam bad kiwei kiwei na ki Survellance Zone sha ki Disease-Free Zone. Ka jingkit ïa ki sniang tang hapoh ka Survellance Zone la shah lait noh ban kit sha ki Infected Zone.
Nalor kane, la khang ruh ban rah ïa ki doh sniang na ki Surveillance Zone sha ki Disease-Free Zone haba bthah ba ïa ki sniang kiba ïap, dei ban da tep bha nalor ka jingber shun rben ym ban shu bret sha ki nala, ki wahduid, ki wahheh.
Ka Sorkar kala khang ruh ïa ki briew ban rung ban mih sha ki shnong ba hab hapoh ka Infected Zone katba ïa ki kali ba mih na ki Infected Zone la shah ban mih tang hadien ba la pynkhuid bha bad ba synreit dawai.