U Donald Trump, President barim jong ka America, ula jop, mynta ka sngi, ha ka jingialeh mukotduma, pyrshah ia ka actress, kaba ju ak phlim dakaid, ka Stormy Daniels. Ka Daniels, ka hap ban siew ia ka bai mynrain khmat, ia ki nong iasaid jong U Trump, kaba shongdor $121,000, ha kaba la rai da ka 9th US Circuit Court of Appeals ha California. Ka Daniels, ka la rem ha ka jingialeh mukotduma jongka, pyrshah ia U Donald Trump.
Katei ka nongak phlim dakaid, ka la siew mynta $500,000 ha ka hukum jong ka kashari, kaba dei ba kan siew sha ki riewsaid jong U Trump.
Katei ka hukum, ka mih mynta ka sngi, kaba dei ruh ka sngi, ba ka kashari jong ka Manhattan, ka tian bishar ia U Trump, ha ki 34 tylli ki jingmudui pyrshah ia u, kaba kynthup ia ka jingsiew pisa jongu ia ka Daniels, ba kan buhrieh na ka jingiadei ba buhrieh jongka bad U Trump.
U Trump, ula shah kynnoh haduh 34 tylli ki jingkynnoh pyrshah ia u, kiba dei bad ki kam thok kam shukor jongu bad ki jingsiew pisa, ha ki kam khaii pateng jongu. Kane ka dei ka sien nyngkong, ba U President barim jong ka US, u mad ia kine ki jingshah kynnoh kiba hap ha ki kyndon kiba ia ryngkat bad ki kam pyniap briew.
Ka Harmeet Dhillon, kaba dei ka nongsaid jong U Donald Trump, ka ai khublei ia U Trump, na bynta katei ka bai siew, kaba ka la ioh, da kaba ka ia said ia ka mukotduma jongu.
Katei ka mukotduma, kam don jingiasoh satia bad ka jingshah kem jong U Donald Trump bad kiwei de ki jingkynnoh pyrshah ia u, ha ka kashari ha New York. U Trump, la iathuh, ba ula siew haduh USD 130,000, ha u snem 2016, na ka bynta ban pynsngap jar ia ka, halor ka jingiadei barieh jongka bad U Donald Trump, ha kitei ki por.
Ka Daniels, ka mudui ia U Trump, ha u snem 2018, hadien ka jingthoh jong U Trump, ha ka twitter, ba ka jingkam jong ka Daniels, ba u don u briew, uba byrngem ia ka, ban buhrieh, ha ka jingiadei jongka bad U Trump, ka dei tang ka jingkren bym shongnia satia; hynrei ha utei u snem ruh, ka Daniels, ka la shah rai pynrem, ha kaba la shim, ba ka jingthoh jong U Trump, ha katei ka por, kam dei satia, kaba long beain.
Phi don ban ong eiei?