Yn shim bynta u Lat ka jylla, ha ka rakhe Shad suk mynsiem

Shillong:U Lat jong ka jylla Meghalaya,u Phagu Chauhan un sa leit ban shim bynta lang ha ka Shad suk mynsiem jong ka seng khasi kmie, ka ban long ha ka 10 tarik iaiong 2023.

Kum shibynta ban rakhe ia ka spah bah ha ka riti dustur jong ka jylla Megha laya, ka Seng Khasi Kmie, Mawkhar, Shillong ka la wer sngewbha ia u Lat jong ka jylla Meghalaya ba un don bynta lang ha ka Shad ban ai khublei, ka Shad Suk mynsiem ka ban long ha ka 10 tarik iaiong ha madan shad Weiking kaba don ha jaiaw, Shillong.

U General Secretary jong ka seng u bah Hainess Marbañiang ha ka sngi thohdieng, u la leit ban kynduh ia u lat jong ka jylla Meghalaya, u Phagu Chauhan ban khot sngewbha ia u bad aiti ruh ia ka shithi khot sngewbha.
Ka shad suk mynsiem ka dei ka sngi ka ba kyrpang ha kiba bun ki bynta jong ka jylla Meghalaya, kaba la ap khmih lynti ruh da baroh naduh ki nong jngohkai bad ki paidbah nong shong shnong jong ka jylla ruh kumjuh.

Da ka jing wan don bynta lang jong u lat ka jylla Meghalaya, kan dei ruh ka sngi ka ban sah jing kynmaw ia baroh ki ban sa wan shim bynta lang ha katei ka sngi.

Ha kajuh ka por, u Sri Sri Janardan Das u ba dei u maharaj jong ka international society for Krishna consciousness (ISKCON) jong ka temple ha nongbah Guwahati, u la wan ban jngoh ia u lat jong ka jylla ban rakhe ia ka sngi kyrpang jong ka Ram Navami.