Jurip ka HPC ïa ka Ïingdorbar ba thymmai ha Mawdiangdiang

Shillong:U Lamphang ka ïingdorbar thawaiñ ka jylla u Thomas A. Sangma ha ka sngi Balang, ula lum ïa ka jingïalang jong ka High Powered Committee (HPC) ha kaba ïadei bad ka jingtei ïa ka ïingdorbar thaw aiñ bathymmai ka jylla ha Mawdiangdiang.

Ha katei ka jingïalang la wan ban ïashimbynta lang da u Symbud Lamphang u Timothy D Shira, u Myntri Rangbah ka jylla u Conrad K Sangma, ki Symbud Myntri Rangbah ka jylla kiba kynthup ia u Bah Prestone Tynsong bad u Bah Sniawbhalang Dhar, ki MLA kiba kynthup ïa u Rupert G Momin, Bah Charles Pyngrope, Bah Lahkmen Rymbui, Bah Banteidor Lyngdoh bad ki heh ophisar sorkar.

Katei ka kynhun ka la leit ruh ban jurip ïa ka jingtei ïa ka ïingdorbar thaw aiñ ba thymmai ka jylla kaba don ha Mawdiangdiang.
U Conrad K Sangma ula pyntip lyngba ka Twitter ka jong u, ba ki nongtrei ki dang trei shaid shaid ïa ka kam ha ka ban pynkhuid ïa ka bynta jong ka jingjulor jong ka jingtei khnang ba yn ïoh ban bteng biang ïa ka jingshna ïa ka ïingdorbar.