Lap ka kong Ampareen, ba ka T.43klur ka pisa covid kam jah rngai

Shillong:Ka Myntri ka Koit ka khiah ka Kong Ampareen Lyngdoh, mynhynnin ka sngi Nyng kong, ka la ong ba ka song pisa ba ïadei bad ka khlam Covid-19, ïa kaba la pynsngew thuh bakla ba ka jah rngai, ka dei ka bym pat pynlut satia bad ïa kane ka pisa yn sa pyllait katkum ka jingïaid ka jingtrei jong ki kam ba la ai ban pyntrei.

Ka kong Ampareen ka la pyntip ïa kane haba jubab ïa ka zero hour notice, ba la wanrah da u MLA ka VPP na North Shillong u Bah Adelbert Nongrum halor ka RTI ba la pan da u Bah Disparsing Rani, kaba kynnoh jah rngai haduh T. 43 klur ka pisa ba la mang ban ïakhun ïa ka khlam Covid hapoh ka Jylla.

Ka Kong Ampareen ka la pyntip ba ha ka por ba lynshop ka khlam, ka Sorkar India lyngba ka Ministry of Health & Family Welfare ka la wanrah ïa ka song pisa Emergency Covid Response Package ban kyrshan ïa ki Jylla ha ka jingïakhun pyrshah ïa ka Covid.
Ïa kane ka song pisa la ai ïa ka Meghalaya ha ki ar bynta kata ka ECRP Phase I bad ka ECRP Phase-II. Ïa kane la bei lyngba ka National Health Mission.
Ka ïathuh ba ka ECRP Phase-I ka dei kaba la mang 100% da ka Sorkar Pdeng katba ka ECRP-II ka dei kaba la mang 90 la 10 hapdeng ka Sorkar Pdeng bad ka Jylla. Ka ECRP-I ka dei jong u snem 2020-21 bad ka ECRP-II ka dei jong u 2021-2022.
Ka Myntri, ka la pynshai ba ka jingkylli ba la wanrah ha ka sien ba khatduh ha Ïingdorbar kata ha ka Dorbar Synrai u 2022, ka long ba ka song pisa ba la pynlut ka dei na ka Sorkar Pdeng bad Sorkar Jylla kumjuh. Namar kata, ka jubab ba la ai ka ong ba T. 76.56 klur hapoh ka Ïingdorbar.

Ka la kdew ruh ba ka RTI sha ka Ministry ka Sorkar Pdeng, ka la pan ïa ka song pisa ba la mang ïa kaba ka jubab bala ai ka long ba kat haduh ka 20 tarik Kyllalyngkot, 2023, ka long T. 104.12 klur.
“Nga kwah ban kdew hangne ba ka song pisa ba la kdew ha ka RTI ka dei kaba dei hynrei, ka jubab ba la ai ha ka Dorbar Synrai ka long halor ka pisa ba la dep ban pynlut,” ong ka kong Ampareen.

Ka Myntri ka la pyntip ruh ba shibun ki kam la pyntrei na ka ECRP-II kiba dang ïaid haduh mynta. Nalor kata, ka jingmang ïa kawei na ki kam ba heh bha jong ka song ka Critical Care Block kaba kot haduh T. 21.38 klur, la ai kham hadien ïa kiwei kiwei ki kam. Ka jingpyntrei ïa kane ka kam ka dang shu sdang bad kam pat don satia ka jingpynlut ïa ka pisa.
“Namar kata, ka pisa ba la ïasngewthuh bakla ba ka jah rngai ka dei ka bym pat pyndep bad yn sa pyllait ïa ka katkum ka jingïaid ka kam ba la pyntrei,” ong ka kong Ampareen.