Ba ther u lapbah, ka jingkieng ka kylla wah, sahkut ki kali ha surok; byrthen U Sordar Mukertila, ban khang ia ka surok Dawki

Shillong:Da ka jingwan jong u slap bah ka lyiur, kumta ka surok na Umsyiem sha Dawki, ka la sniew palat than ha kine ki sngi, ha kaba ki bynta jong ka surok, ki la kylla long long kum ka lynti iaid jong ka um, kaba tuid na surok wah sha Wah Umngot.

Katei ka surok, ka la dap da ki thliew ki syar suda, la jan shisnem eiei, hynrei, ym shym la don ba maramot satia bad mynta, la iohi, ba ki mawkynroh kiba kyr shan ia katei ka surok, hajan ka jingkieng Dawki, ki la nang hap ban nang twa noh bad ka don ka jing ima kaba khraw, ba lada ka PWD, kam maramot kyrkieh, kumta katei ka surok, kan lah ban twa ha kano ma kano ka sngi, khamtam, ynda haba la nang ka jinghap slap ha ki khyndiat bnai ban sa wan.

U Bah Friendly Kongwang Sordar ka Raid Mukertila, haba iakren bad U Rupang, mynta ka sngi, ula iathuh ba ka jingsniew jong ka surok, ka la buh jingeh, wat tang ban iaid kjat ruh na Umsyiem sha Dawki. “Ka jingkieng ka la kylla wah bad ki kali rit lei ki la sahkut hapdeng ka surok”.
Da ka jing sngew bitar shla, halor ka jingleh sting jong ka tnat PWD bad ka kompeni NHIDCL, kumta U Sordar, ula byrthen, da kaba ong “Naduh ka 1tarik Iaiong, ngin khang noh ia katei ka surok”.
La iathuh ruh, ba haba leit iakren ia ka kompeni NHIDCL, kaba don ha Mylliem, ka jubab, kaba ki ioh, ka long ba kin sa trei noh shen ia katei ka surok, hynrei, katei ka shu long, tang ka jingkren thok kren shukor ia ki nongsynshar shnong jong ka thain, ong U Bah Kongwang.

“Kumta, ba kan nym buh jingeh satia ia ki paidbah, kiba leit ba wan, dei ban khang noh shisyndon ia katei ka surok” ong u Sordar Raid. Khyndiat sngi mynshwa ruh, la iathuh, ba ka don kawei ka trok kit maw, kaba hap na katei ka jingkieng Dawki sha Wah Umngot, ha kaba ka kali, ka la sahkut ha shiteng riat bad u nongniah, ula mynsaw, ong ka khubor.

Kawei pat khubor, ka iathuh ba mynta ka sngi, ka la don ka jingdheng kali, kaba jur bha ha ka shnong Iarbamon bad shaduh sha ka jaka thew kali, kaba la sdang, naduh ka por 10 baje mynstep, tad haduh ka por 1baje nohsngi, haduh, ba kin poi ki pulit pynbeit kali.