Pynkhreh ka UDP ia ka elekshon ha Sohiong, ka MDC & MP

Shillong: Ka jingialang jong ka Central Executive Committee (CEC) jong ka parti United Democratic party (UDP) kaba la pynlong ha ka sngi nyngkong, ki la ioh ban iakren ia ka elekshon ka ban sa long ha Sohiong constituency, ka elekshon MDC bad MP ka ban sa long la shem snem.

Haba iakren bad ki lad pathai khubor, hadien ba la wai ka jingialang u General Secretary jong ka parti u Dr Jemino Mawthoh, u la iathuh ba haba iadei bad ka Sohiong constituency, kaba la pynkynriah noh ia ka elekshon hadien ka jingkhlad ba kyndit noh u kyrtong jong ka parti na katei ka constituency u (L) bah HDR Lyngdoh ka tnat pyniaid elekshon ki la pynkynriah noh ia ka elekshon bad kumba long hi ba haduh mynta kim pat pynbna satia ia ka tarik.

Hynrei na ka liang jong ka parti UDP, pat ki la iaid shakhmat ban pyntyllun ia ka kam bad ban pynbna noh ruh ia ka kyrteng jong u kyrtong, u ban iakhun ia ka elekshon na Sohiong constituency.

Kumta u Dr Jemino Mawthoh, u la iathuh ba ha ka 25 tarik lber 2023, ka parti UDP kan pynlong ia ka jingialang ban pynbna noh ia u kyrtong jong ka UDP, u ban iakhun na Sohiong constituency.

U Dr Jemino Mawthoh, u la iathuh shuh ruh, ba haba iadei bad ka MDC elekshon la shem snem ki la pynkhreh bha bad aiti ruh ia ki kam sha ka core committee jong ka parti ban pyntyllun shakhmat ia ki kam jong ka parti, na bynta ka elekshon MDC bad MP.

Haba iadei bad ka MP elekshon u Dr Jemino Mawthoh u la ong ba ka MDC bad ka MP hi ka jing pynkhreh kan long beit syndah syndah.

U la ong ruh ba ia u kyrtong MP, hi ka parti kam pat dep rai satia haduh mynta bad ki dang hap ban iakren bad shong pyrkhat bha ha ryngkat ka state election Commitee ha shwa ban shim ia ka rai ba biang tam.

Haba iadei bad ka jingiakynduh lang jong ki nongtrei jong ka parti ne kata ka (General council) u Dr Jemino Mawthoh u la iathuh ba ka la don ka jingiakren ba ha u bnai Jymmang, mynta u snem kin sa lah ban pynlong ia kane ka jingialang, namar ki la pynkynriah noh ia kaba ka don ka jingiatakhuh bad ka elekshon ba dang shu dep shen.