Dang ap jubab ka sorkar, na ka ME ban pyllait ïa ka CUET

Shillong:Ka Sorkar Jylla ka dang ap ïa ka jubab na ka Ministry of Education (ME) ban pyllait ïa ka Megha laya na ka jingpyn long ïa ka Common University Entrance Test (CUET).

“U Myntri Rangbah jong ngi ula ïakynduh ïa u Myntri ka Sorkar Pdeng bad kyrpad ban pyllait noh ïa ka Meghalaya bad ngi dang ap mynta ïa ka jubab na ka Ministry,” ong u Rakkam A Sangma, Myntri ka Tnat Pule Puthi haba ïakren bad ki nongthoh khubor.

Ha ka shithi ba la phah sha u Myntri ka Sorkar Pdeng Dharmendra Pradhan ha ka 7 tarik Lber, u Myntri Rangbah Conrad Sangma ula ong, “Namar ba bun ki college ha Jylla ki dei kiba ïasoh bad ka North Eastern Hill University, nga kyrpad ïa ka Ophis jong phi ban pyllait noh ïa ka Jylla Meghalaya na ka jingpynlong ïa ka CUET”.

“Ka Jylla Meghalaya dang shen ka la pynlong ïa ka ilekshon MLA, ïa kaba la pynbna result dang ha ka taïew ba la lah. Kane ka la lam sha ka jingslem ban pynlong ïa ka State Board Examination bad halor kane, ki samla pule kila mad ïa shibun ki jingeh ban ïakhun ïa ka CUET na ka bynta ki jaka pule Under Graduate hapoh ka Jylla,” ula ong.

U Myntri Rangbah ula pyntip ruh ba ka Sorkar ka la shim ruh ïa ki sienjam ban pynkha ïa la ka jong ka State University. “Ngin sa ïoh shen ïa ka jingmynjur na u Lat ka Jylla”.
Ha u bnai Jymmang, 2022, u Myntri ka pule puthi ka Sorkar Pdeng, ula mynjur ban pyllait ïa ka Meghalaya na ka jingpynlong ïa ka CUET katkum ka jingkyrpad jong u Myntri Rangbah ka Jylla.