“Ka KHNAM kam pat duh, ngi pynkhreh ia ka elekshon MDC”

Shillong:Ha kine ki khyndiat sngi la iohi, ia kawei ka jingthoh ka ba la saphriang lyng ba ki social media, bad katkum ba paw, la batai ba ia kane ka jingthoh la thoh da U Bah Sainkupar Nong traw lyngba ka face book. Ha kane ka jing thoh la kdew ia ki kyrteng jong ki seng riewlum kiba la duh noh, kum ka APHLC, HPU, PDIC, MPPP, MNCP bad PDA, hynrei la paw ruh ka kyrteng jong ka seng KHNAM kum ka seng kaba la duhnoh, ia kaba na ka liang ka seng ngi kwah ban pynshai ba ka KHNAM kam pat duh, hynrei ka dang don haduh mynta bad ka dang pynkhreh ruh ia ka election sha ka District Council.

“Ngim pynrem ia ki jingthoh namar ki dei ki jingthoh ki ba lehse ngin hap ban kubur ba ka jingbun ki seng riewlum ka pyntlot ia ka sain Hima Sima trai Ri bad ka plie lad ia ki nongwei ban tuklar ia ka synshar ka khadar ha ka jylla jong ngi. Lada kan wan ka por ban mih tang kawei ka seng riewlum, ka KHNAM ka long kaba kloi ban ia trei lang, hynrei ia kaba mynta hi ka KHNAM kan dang iai don ban pyndep ia la ka deiti bad ngin iai ap khmih lynti ia ka sngi jong ka jingiatylli” ong ka kyrwoh, na U bah F Marpna, General Secy, KHNAM, Central Executive Committee.