Shillong:U Nongïalam ka NPP bad Symbud Myntri Rangbah u Bah Sniawbhalang Dhar, mynhynnin ka sngi ba-ar, ula ong ba ka NPP kan sa leh ïa ka ‘Post Mortem’ ne ban tih tynrai ïa ka daw halor ka jingbym lah ban leh bha jong ka party ha Ri-lum Khasi ha ka ilekshon MLA ba dang shu dep long.
“Ngin sa tih tynrai ïa ki daw halor kane hadien ka Dorbar Mang tyngka jong ka Ïingdorbar Thaw Aiñ,” ong u Bah Sniawbha haba ïakren bad ki nongthoh khubor.
Ka National People’s Party (NPP) ka la jop tang 9 seat na Ri-lum Khasi bad Jaiñtia. Napdeng kine, artylli ki dei na East Khasi Hills District.
“Ka result ha Ri-lum Jaiñtia ka biang namar ngi la kheiñ antad ban ïoh 4-6 seat. Kumjuh ruh, ha Ri-Bhoi, ngi la antad ban ïoh 1-3 seat, hynrei ngi khlem poi pyrkhat ha Ri-lum Khasi,” ula ong.
Haba kylli la ka jingsngew pyrshah u paidbah ïa ka NPP ha ka Ri-lum Khasi ka kham jur, u Bah Sniawbha ula ong, “Ka long kaba eh ban ong namar ngim pat tip ïa ka daw tynrai balei ba ngi rem na bun tylli ki constituency ha Ri-lum Khasi. Namar kata, ngin sa tih tynrai ïa ki daw tang mar sien kut ka Dorbar Mang tyngka khnang ba ngin lah ban leh bha ha ka ilekshon ban wan”.
U Symbud Myntri Rangbah ula kyntait ban mynjur ba ki paidbah ka Ri-lum Khasi kim pdiang ïa ka NPP bad ong, “Ki don bun ki daw. Phi tip ha Ri-lum Khasi, ki don shibun ki seng saiñ pyrthei-ka UDP, PDF,BJP, NPP, VPP. Hynrei kam mut pat ba ym pdiang ïa ka NPP. Ban ïoh 26 seat ha baroh kawei ka Jylla kam dei ka kam kai”.
Haba kynthoh ïa ka jingïakhih ba dawa Myntri Rangbah na Ri-lum Khasi-Jaiñtia, u Bah Sniawbha ula ong, “Ban dawa Myntri Rangbah da u Khasi nga sngew ba ka long kaba bakla namar ngi hap ban burom ïa ka rai u paidbah”.
U ong ba lada ki paidbah ki kwah ba u Myntri Rangbah un dei na Ri-lum Khasi Jaiñtia, ai ba kin vote ïa kawei ka Party ha ka thaiñ.
“Ai ba kin vote tang ïa kawei ka party na Ri-lum Khasi-Jaiñtia. Ki lah ban vote ïa ka UDP, ne NPP lada ki kwah hynrei kila vote ïa ki party bapher bapher. Ngan ong aïu shuh,” ula ong.
Ha kawei ka liang, u Bah Sniawbha ula kubur ba ka lawei jong ka party ha ki katto katne ki constituency kum ha Nongkrem bad Mawlai ki la shah ktah jur bha na ka jingmih jong ka party thymmai Voice of the People’s Party (VPP).
Haba phai sha ka result ilekshon jong ka All India Trinamool Congress (AITC) bad ka Bharatiya Janata Party (BJP), une u Nongïalam ka NPP ula ong ba kine baroh artylli ki party ki dei ki bym pat pdiang satia hapoh ka Jylla.
“Lada ka party ka lah ban ïoh tang 2-3 seat ka mut ba ki dei ki bym pat pdiang da ki paidbah ka Jylla,” ula bynrap.
Phi da leh sa da kaei2 ruh ym myntoi re namar ki paidbah kila ngiah iaka npp, mynta baroh ha u PRAH lut.
Tang namar la theh ei ki skhim ha mawlai lyngba u MDC npp hynrei sepei lut ba thmu bat ia u la kam khlem peit skhim ki paidbah ki jied ia u briew ba stad.
U ba rem u kham bun ki daw ban aidaw da kumne kumtai,..