Ia U Blei, ngin iaroh, ia ka pisa ngin iatroh

Ka elekshon MLA, ka dang shu kut shen bad kane ka dei kawei na ki elekshon, kaba jubor bha ka jingioh kurup pisa jong ka tnat elekshon.

Ym tang ka pisa, hynrei, ka jingioh kurup kyiad bad kiwei ruh, ka jubor bha ha kane ka sien ba ladep bad kam kut tang katta, hynrei ngi iohi, sa ka iashoh iadat, ia thang iing bad ia pyniap briew, bad katei ka pyni, ba wat haba la rem elekshon ruh, ki dang bun bah, kiba dang sah biej ka janor, ba shah teh mraw ha ka pisa ioh ei.

Hadien ka elekshon, wan sa ka jingiaseng Synod ha Lyngkhoi bad ki shakri jong U Blei, ki shim ia ka lad, ban tied syndon na ki khohwah ba kdor jong ki rhah pisa, ha kaba kiba bun bah, ki dei ki khun Kristan hi, lane kumba ngi ia ong “Ia U Blei ngin iaroh, ia ka pisa ngin iatroh”.
Ka elekshon eit aiu kum kane, ha kaba ki ia sam pisa mynsngi mynshai, ha kaba u nongai ruh um riej shuh bad u nongtare ruh, um salia shuh satia bad kane kein, kata ka elekshon, kaba ki riewngeit Khristan, ki ia praktis ha kine ki sngi bad ym ju lah mutdur ruh, ba ha kum kine ki por, ba ki don bun bah kiba kem pang kyndit, kiba kwah thied sut kyndit, kiba donkam bai skul bad kiba kwah bai dawai bad ka jingdawa kaba da ka san bad ka shiphew hajar shi khlieh briew.

Ha kum kane ka por, haba don jingiaseng ha iing, leit pan pisa na u kandidet, haba donkam shuki, leit pan na u kandidet bad haba donkam thied doh, thied shni, thied slasha ruh, leit dawa pisa na u kandidet bad haba kumta, ka pyni, ba katei ka jingiaseng, ka kylla ka rongphong bad kam dei shuh ka jingshakri da ka jingieid bad ka jingmaian Blei.
Phim tip, ba kato ka pisa, kaba phi ioh, ka dei kaba shu lute na ki trok, shu lute na ki mahajon masi, shu lute na ki kontraktor bad phim tip ruh, ioh katei ka pisa, ka dei ban leit sha ka iing kaba kyrduh bad kaba duk tasam bad kaba donkam hok, ia ka bai dawai, bai khaw, bai kot skul; hynrei ba la shu knieh jubor na u kpa jong ka iing (lehse u draibar trok) bad na katei ka pisa ioh ei, phi pynbam khawai ia ki para bangeit bad nangta phi sa duwai jur ia ka jingkyrkhu jong U Blei, lane phi leit ai jingainguh ruh da katei ka pisa tuh bad haba kumta, phi khmih lynti, ba phin ioh jingkyrkhu na ka pisa, kaba shu lute jubor na ka umsyep kiwei?

Ka jingsyngngeit ki pastor, ha ka Synod ha Lyngkhoi, ka dei ban pynpei shkor ia ki kristan ka nam bad suidtan ka kam bad ka por, ka la dei ia ki Balang Kristan, ba kin pan ia ka jingdon spah ki dkhot jong ki balang jongki, ban peit ia ka jingkiew spah jong ki (kumba leh ka tnat elekshon) bad lada ki nud ban thok ia ka balang, kata ka la biang ban bret ia ki sha ka lawar ding ba khlem trai bad kan jin da la bha hi ruh, ba ha ki snem elekshon, ba kitei ki jingiaseng heh, yn pynlong noh ha shwa jong ka sngi thep vote, ba kin peit mat ki shkor jong kiba kyllut.