Yn tied pyrthat, meh leilieh bad khie eriong, ha ki bynta jong ka jylla

Shillong: Ka tnat peit mariang jong ka sorkar India, ka India Meteorological Department (IMD), ka pyntip, ba lashai ka sngi, kan don ka jinghap slap, ba malu mala ha ka nongbah Shillong bad ki jaka kiba don ha marjan jongka.

Ha kajuh ka por, katei ka tnat, ka iathuh lypa, ba ha ki 24 kynta, ban sa wan, kan don ka jingtied pyrthat, ka jingmeh leilieh bad ka jingkhie eriong, ha ki katto katne jaka, ha kaba ka jingstet ka eriong, kan long hapdeng ka 30 haduh 40 Kilometre ha ka shi kynta. Ka jingsngem ka mariang, ha ka por mynstep, ka long 79 percent, katba ha ka por janmiet, ka mariang ka tyrkhong bha, ha kaba ka jingsngem, ka long tang 57 percent.