Ki seng trai ri, ki dei kiba la synshar na kajuh ka longing, ong U Nadda

Chennai:U President ba hakhliehduh jong ka parti BJP, u JP Nadda u la ong ba ki seng riewlum kim lah shuh ban ai jing shakri haba iadei bad ka jing thrang jong ki riew lum, hynrei ki la kylla pynban sha ka saiñ hima sima da ka jing ia hiar pateng na kajuh ka longiing.

Hadien ba u la dep plie ia ka ophis treikam ba thymmai jong ka parti BJP ha Tamil Nadu, u la ong ba ka parti BJP kan iakhun pyrshah ia ka saiñ hima sima ba hiar pateng, ia ki parti kum ka DMK,TMC bad BRS ha jylla Tamil nadu, West Bengal bad Telangana.
U la ong ruh ka parti Congress kaba la synshar ia ka jylla Tamil Nadu ha ki 60 snem tam, hynrei mynta ka kynti ka khlem suh thied shuh, u la iathuh.

U la ong ruh ba ka jing bym suhthied shuh ka parti Congress ha Tamilnadu, ka dei namar ba kim sngew thuh ia ka jing thrang bad jing angnud jong ki trai shnong bad kumta ki seng trai ri ki mih pyrthei.
Hynrei kumba long mynta baroh ki seng trai ri, la pynkylla sha ki seng saiñ hima sima ba hiar pateng bad kim don shuh ka jing thmu na bynta ka jing angnud jong ki paid riewlum ne trai jylla.

U la ong ruh ba ka parti BJP ka iakhun pyrshah ia ki parti ba hiar pateng ha kiba bun ki jylla.
U la iathu ruh ba ka jingmut jong ka parti DMK, ka dei synshar hiar pateng, ka jingbamsap bad ka katta panchayat.
U Nadda u la ai ruh ka jingiaroh ia ki nongtrei jong ka parti BJP ha ka jingjop ha ka jylla Tripura, Meghalaya bad Nagaland bad u la khot ruh ia kane ka jingjop kum ka kambah jong u Myntri Rangbahduh jong ka ri u Narendra Modi haba iadei bad ki kam ka roi ka par.