Ka BJP kan ym kyrshan ia ka jingdawa Tipraland ka Tipramotha

Agartala:U Myntri Rangbah jong ka jylla Tripura, u Dr Manik Saha ha ka sngi palei u la ong ba ka parti BJP kan ym pdiang ne ai jingkyrshan satia ia ka jingdawa jong ka seng saiñ pyrthei riewlum ba thymmai ha katei ka Jylla ka Tipra motha party (TMP) haba iadei bad ka jing dawa ia ka jylla ba thymmai kata ka Greater Tipraland.

U la ong ia kane ha ka jing iakren bad ki lad pathai khubor, hadien ba u la wanphai biang sha ka shuki myntri rangbah jong ka jylla Tripura ha ka sien ka ba ar.

U la iathuh ruh ba ha ka jing ialang ba dang shu dep shen ki la iatai iathir kumno ban kyntiew ia ki riewlum bad ki trai shong haba iadei bad ka long ka man ka ioh ka kot ka jong ki ban kyntiew ia ki trai ri trai muluk ka dei ka thong ba ha khmat, hynrei ngin ym ai jingkyrshan satia ia ka jing dawa jylla Tripraland.

Ka jingeh jong ki trai shnong yn sa pyndep noh ha kine ki khyndiat sngi ban wan, ha kaba na ka liang jong ka parti bad ka sorkar kin trei shitom na bynta ka roi ka par.
Kum ban shu pynkynmaw ba ha ka sngi balang u khlieh duh jong ka Tripra motha party,u Pradyot Kishore manikya Debberman, u la shong jingialang bad u myntri ki tnat kam pohïing ka sorkar kmie u Amit Shah, president jong ka BJP,u J.P Nadda, ha ryngkat u Myntri Rangbah jong ka jylla Tripura u Dr Manik Saha.
Ha ka jingialang ba nyngkong jong ka kynhun myntri sorkar la jied ia u Binay Bhusan Das MLA kum u lamphang ba shipor jong ka ïingdorbar thawaiñ ka jylla Tripura.