Ka elekshon MLA 2023, khlem pep, ka la pynkyndit jur, ia ki ar tylli ki seng sain pyrthei ba heh tam jong ka India bad kita ki dei ka Trinamool Congress (TMC) bad ka Bharatiya Janata Party (BJP), na ka daw, ba kitei ki ar tylli ki seng, kim shym la leh bha eiei ruh em bad ba ka BJP, ka jop tang arngut ki MLA; nangta ka TMC, kaba la trei bor bah, la jan shisnem kynthih, ka jop tang 5ngut ki MLA bad wat U Mukul Sangma, ula shah rem ialade ha Tikrikila, nangta u para jongu, na Rangsakona bad ka tnga jongu ruh, ka shah rem noh, na Mahendraganj.
Kam dei tang katta, hynrei, ka dei ruh ha kane ka elekshon, ba imat u paidbah, ula sdang stad bad ba um kwah pisa satia, namar ba ka VPP, ka seng thymmai, ka jop haduh 4ngut ki MLA bad kaba la shim, ba ka dei ka parti duk; nangta ba U Bah Dasakhiat Lamare, u kyrtong heh spah ka NPP, u shah pynrem ialade ha Nongkrem, hadien ka jingtrei shitom jongu, kaba la jan dap shisnem kynthih.
Ym tang katta, wat ka UDP, ka seng trai ri, kaba la sdang tlot bor ha ki phew snem ba ladep, hynrei, la iohi, ba ka la nang khie san ha kine ki sngi, da kaba ka ioh 11ngut ki MLA, nangta ka HSPDP, ka dang iai bteng hi, ia kajuh ka jingkhein bad wat ka PDF ruh, ka dang iai bteng hi ban don ha kajuh ka number, lait noh, na kito kiba la phet da ka mon sngewbha ialade.
Na ki jingjia, kiba jia ha kane ka kynti, ba mynta, la iohi, kumba kat ka jingtriem jong ka IPAC, kaba ju pyniaid elekshon, ha kylleng ka Ri India, hynrei ka jah jingkhein noh sha Garo Hills bad katei ka pyni, ba U Conrad Sangma, u kham stad bad u kham shemphang, ban pynngam ia ki buit buhrieh jongu, kiba ki heh ka TMC bad U Mukul Sangma ruh, lehse kim shym la lap satia.
U Amit Shah, haba u leit sha Garo hills, u kren kob sob, ba ka BJP, ka la weng noh ia ka jing iatreilang bad ka NPP bad ula thad pynjah burom ia U Conrad Sangma bad kat utei u heh duh jong ka sorkar India, ula leit thad pynjah burom ia U Conrad Sangma, nongialam ka NPP, da ki kam tuh kam thiem bad ki kam bamsap ba shyrkhei tam; hynrei, kitei ki jingkren kim lah satia ban pynkylla sha ka vote bad katei ka pynshisha, ba ki phormula jong ka TMC bad ka BJP pleng, kim iahap eiei ruh em bad ka politiks jong ka Meghalaya.
ia kanei ka Kam ka ba da dep jia bad ka la urlong ….fi at fin Ong kumno ……phi lah tip ba ka kam election…it’s a darty game in platform ..only ….inside da private ….na u juh u khiew ja ki ia peh lang ..bad duwai lang ki ia bam sngewbha ……..